Goran Dragic táraðist þegar hann fékk treyju Petrovic að gjöf | Myndband

Goran Dragic, nýkrýndur Evrópumeistari með Slóveníu og besti leikmaður Evrópumótsins, fékk að hans eigin mati bestu gjöf sem hann hefur fengið á ævinni þegar hann kom aftur heim til Slóveníu eftir að slóvenska körfuboltalandsliðið tryggði sér Evrópumeistaratitilinn.

Dragic hreinlega táraðist þegar hann fékk NBA treyju Drazan Petrovic að gjöf frá móður Drazan en treyjan var frá því að Petrovic spilaði með New Jersey Nets í NBA-deildinni.  Goran sagði hreint út að þetta væri besta gjöf sem hann hefði fengið en Drazan Petrovic var fyrirmynd hans.

Dragic var í sjónvarpsviðtali þegar hann fékk treyjuna og gat ekki haldið aftur af tilfinningum sínum.

Goran Dragic spilaði í treyju númer 3 á Evrópumótinu til heiðurs Drazan Petrovic sem dó í bílslysi á hápunkti ferils síns. Petrovic var skotbakvörður en hann varð eins og Dragic í ár, bæði Evrópumeistari og valinn besti leikmaður EM á Evrópumótinu 1989 þegar hann hjálpaði Júgóslavíu að vinna titilinn.

Goran Dragic skoraði 35 stig í úrslitaleiknum á dögunum en Drazan Petrovic var með 28 stig í 98-77 sigri á Grikkjum í úrslitaleiknum í Zagreb 1989.

Árið 1989 var Slóvenía hluti af Júgóslavíu en titill Slóvena á sunnudagskvöldið var fyrsti Evrópumeistaratitillinn hjá fyrrum ríki gömlu Júgóslavíu eftir að landið skiptist upp.

Móðir Drazan Petrovic hefur haldið nafni sonar síns á lofti allar götur að hann lést árið 1993 þá aðeins 28 ára gamall.

Hér fyrir neðan má sjá þetta magnaða viðtal við Goran Dragic þegar hann fékk treyjuna af gjöf.