Hætt við sameiningu Virðingar og Kviku

Stjórnir Virðingar hf. og Kviku banka hf. hafa tekið sameiginlega ákvörðun um að slíta viðræðum um sameiningu félaganna. Ákvörðun um að enda samrunaferlið, sem hófst formlega 28. nóvember síðastliðinn, er tekin að vel ígrunduðu máli og er það sameiginlegt álit stjórna beggja félaganna að fullreynt sé. Starfsfólk Virðingar og Kviku hefur lagt hart að sér við undirbúning samrunans og hefur sú vinna gengið afar vel þrátt fyrir þessa niðurstöðu, segir í tilkynningu.

Hjá Kviku fjárfestingabanka starfa 86 sérfræðingar, en hjá Virðingu sem er alhliða verðbréfafyrirtæki starfa 34 sérfræðingar. Í upphafi stóð til að hluthafar Kviku myndu eftir samruna eiga 70 prósent hlut í sameinuðu félagi og hluthafar Virðingar 30 prósent.

Þann 15. mars síðastliðinn greindi Vísir frá því að talsverð óvissa væri um hvort stjórnir Kviku fjárfestingabanka og Virðingar myndu ná samkomulagi á næstunni um útfærslu og helstu skilmála á boðuðum samruna.