Alþjóðlega skátamótið: Skátarnir leggja til allt að 20 þúsund klukkustundir í sjálfboðavinnu samanlagt

Alþjóðlega skátamótið sem haldið er um þessar mundir gengur prýðilega að sögn Hrannar Pétursdóttur, mótsstjóra. Þrenns konar dagskrá er í boði fyrir skátana. Hægt er að velja um náttúru og útvist, menningu og samfélag eða náttúru og umhverfi.

Hún segir að búið sé að dreifa skátunum um allt land þar sem þeir sinna hinum ýmsu verkefnum. Skátarnir hafi allir sitt áhugasvið og tekið hafi verið tillit til þess þegar þeim var skipt niður í hópa.

Sinna sjálfboðaliðastarfi

Hluti af skyldum þeirra þessa daga sem þeir eru hér er að sinna sjálfboðaliðastarfi. Hafa því skátarnir aðstoðað sveitarfélög við að leggja vegi, setja niður blóm og við skipulagningu bæjarhátíða svo fátt eitt sé nefnt.

„Allir þátttakendur vinna í sjálfboðavinnu, samfélagsverkefni þar sem þeir leggja til fjórar til sex klukkustundir. Þetta eru sem sé 20 þúsund vinnustundir eða sem samsvara ellefu mannárum í vinnu sem allir þessir skátar eru að leggja til. Þá er það þannig að sveitarfélögin og samfélögin leggja okkur til verkefnin,“ segir Hrönn í samtali við Vísi. Hún segir mikla kunnáttu og færni vera í hópnum. Ekki er um að ræða fjóra til sex klukkustundir á dag heldur er þeim dreift yfir tímabilið.

Umfangsmikill viðburður

Hrönn segir að þetta sé umfangsmesti viðburður Íslandssögunnar.

„Þetta er, að því er við best vitum, umfangsmesti viðburður Íslandssögunnar. Þetta eru níu daga og rúmlega 5000 manns frá í kringum 100 þjóðum og við leggjum allt til. Ef það er tónlistarhátíð þá leggurðu til dagskrána og setur upp sölubása en þú ert ekki að gera meira. Við erum að gera allt, við erum með allar ferðir, allan mat, alla svefnstaði, alla dagskrá; við erum með allt. Við sjáum um nánast allt í lífi þessa fólks þessa níu daga,“ segir Hrönn.

Bæjarbúar til bjargar

Slatti af farangri skátanna komst ekki til skila þegar þeir komu til landsins. Hrönn segir skátanna ekki hafa gefist upp og hafi nokkrir á suðurlandi til að mynda auglýst eftir svefnpokum á Facebook grúbbu Selfoss og viti menn, íbúar komu þeim til bjargar.

„Það eru allir að leggja til lið með okkur við það að láta þetta ganga upp og það er algjörlega frábært,“ segir Hrönn að lokum