Lögreglan rannsakar tvær hnífstungur á Flúðum

Lögreglan á Suðurlandi hefur nú til rannsóknar tvö tilvik þar sem eggvopni virðist hafa verið beitt gegn einstaklingum. Þetta kemur fram á Facebook síðu embættisins.

Fyrra tilvikið átti sér stað aðfararnótt laugardagsins 5. ágúst milli klukkan 04 og 05 og er talið að ung kona hafi orðið fyrir hnífstungu með vasahníf í hægra læri þar sem hún var stödd við salerni tjaldsvæðisins á Flúðum. Vinir stúlkunnar fóru með hana á Heilbrigðisstofnun Suðurlands á Selfossi þar sem gert var að sárum hennar. Atvikið var tilkynnt til lögrelgu í gær en um minniháttar meiðsl er að ræða samkvæmt lögreglu.

Um klukkan 4 aðfaranótt sunnudagsins 6. ágúst tilkynti ungur maður að hann hafi orðið fyrir hnífstungu á jaðri unglingatjaldsvæðisins á Flúðum. Gæsla og lögregla voru kölluð til og var hann fluttur á Heilbrigðisstofnun Suðurlands. Meiðsl hans eru einnig talin minniháttar.

Ekki er vitað hver eða hverjir voru að verki og óskar lögreglan eftir því að þeir sem mögulega búa yfir upplýsingum um málið hafi samband við lögreglu í síma 444-2000, á facebook eða með tölvupósti á sudurland@logreglan.is