IKEA innkallar strandstól vegna slysahættu

IKEA hefur innkallað strandstólinn MYSINGSÖ vegna slysahættu og hefur hvatt viðskiptavini sem hafa keypt stólinn til að skila honum og fá endurgreiddan.

Í tilkynningu frá IKEA segir að eftir að áklæðið hafi verið tekið af til að þvo það, sé hægt að setja það aftur á með röngum hætti þannig að það skapi hættu á að stóllinn gefi sig eða notandi klemmist.

„IKEA hafa borist fimm tilkynningar um MYSINGSÖ stóla sem hafa tengst óhöppum eftir að hafa verið settir saman á rangan hátt. Í öllum fimm tilvikum slasaðist fólk á fingrum. Þessi tilvik gerðust í Finnlandi, Þýskalandi, Bandaríkjunum, Danmörku og Ástralíu.

Öryggi vöruúrvalsins er í forgangi hjá IKEA og allar vörurnar okkar eiga að uppfylla bæði alþjóðleg og innlend lög, auk viðeigandi staðla. MYSINGSÖ stóllinn hefur staðist margvíslegar prófanir.

Ráðist var í umfangsmiklar rannsóknir eftir að tilkynningarnar bárust. Þessar rannsóknir leiddu til umbóta í hönnun til að koma í veg fyrir að mögulegt sé að setja stólinn rangt saman. Uppfærður stóll verður fáanlegur í IKEA verslunum frá apríl 2017, segir í tilkynningunni.