Skrifaði undir nýjan samning degi fyrir úrslitaeinvígið

Halldór Jóhann Sigfússon hefur skrifað undir nýjan tveggja ára samning við FH.

Halldór hefur stýrt karlaliði FH frá árinu 2014 og nú er ljóst að hann verður áfram við stjórnvölinn hjá liðinu.

Á morgun hefst úrslitaeinvígi FH og Vals um Íslandsmeistaratitilinn. FH-ingar urðu deildarmeistarar og hafa unnið alla fimm leiki sína í úrslitakeppninni til þessa. Þá vann FH einnig deildabikar HSÍ í lok desember á síðasta ári.

Halldór var áður við stjórnvölinn hjá kvennaliði Fram sem hann gerði að Íslandsmeisturum 2013.

Fyrsti leikur FH og Vals í úrslitum Olís-deildar karla fer fram í Kaplakrika klukkan 20:00 á morgun.