Svandís segir ótækt að uppreist æru sé afgreidd á færibandi

Þingflokksformaður Vinstri grænna segir ekki eðlilegt að endurheimt lögmannsréttinda sé beintengd uppreist æru. Stjórnskipunar- og eftirlitsnefnd Alþingis fjallaði um lögin um uppreist æru í dag og er einhugur í nefndinni um að skoða þurfi þau lög nánar.

Svandís Svavarsdóttir átti frumkvæði að aukafundi í nefndinni í dag vegna þeirrar gagnrýni sem fram hefur komið að undanförnu á að Róbert Downing skuli hafa fengið uppreist æru og þar með endurheimt lögmannsréttindi sín. En hann var dæmdur í þriggja ára fangelsi fyrir að hafa blekkt, tælt og misnotað þrjár ungar stúlkur kynferðislega.

Í dómi Hæstaréttar var Róbert ekki dæmdur vegna brota í starfi og því kom Lögmannafélagið aldrei að mati á því hvort hann skyldi endurheimta lögmannsréttindi sín.

„Við sjáum líka á þessum fundi að það er greinilegt að það hefur skapast sú hefð í dómsmálaráðneytinu að afgreiða þessi mál með afar vélrænum hætti. Það er að segja að það dugi að uppfylla formleg skilyrði. Þar með fáist uppreist æra á færibandi. Það er ekki boðleg staða í réttarríki að svo sé,“ segir Svandís.

Nefndin komi aftur saman í ágúst til að fjalla um málið enda bíði hún gagna sem óskað hafi verið eftir, meðal annars um þau meðmæli sem Róberti voru gefin.

„En það er ekki hvað síst mikilvægt þegar um er að ræða lögmann sem í raun og veru hefur þá stöðu að vera talsmaður laga og réttar frammi fyrir almenningi. Tryggja það að lögin séu framkvæmd með réttum og eðlilegum hætti. Þar sérstaklega þurfi að horfa til þess hver brotasagan er,“ segir Svandís.

Brynjar Níelsson formaður nefndarinnar segir samstöðu í nefndinni um að skoða þessi mál betur. Hvort bæta megi lagaumhverfið varðandi þessi mál. Hann sé þeirrar skoðunar að fólk eigi að hafa möguleika á endurkomu í samfélagið en alvarleiki brota skipti máli í þeim efnum.

Kemur til greina til dæmis að afnema þau lög að forseti Íslands þurfi að koma að svona málum?

„Við þurfum þá væntanlega að breyta stjórnarskránni. Ég held að það sé full ástæða til að fara yfir stjórnarskrána varðandi forsetavaldið og ábyrgð forsetans. Því ég held að það sé í engu samræmi við veruleikann.“

Þannig að þú styður alla vega að þeim hluta í stjórnarskránni verði breytt?

„Já, ég geri það og hef alltaf gert,“ segir Brynjar Níelsson.