Þorgerður hundfúl og vill nýjan fjölnota þjóðarleikvang

„Persónulega tel ég æskilegast að U2 haldi fyrstu tónleikana en er líka opin fyrir Beyoncé,“ segir Þorgerður Katrín Gunnarsdóttir, starfandi sjávarútvegs- og landbúnaðarráðherra, á Facebook þar sem hún lýsir því yfir að Laugardalsvöllur sé barns síns tíma og kominn tími á nýjan þjóðarleikvang í Laugardalnum.

Hún bendir á að eðlilega muni ekki seljast upp á alla íþróttaviðburði á stærri þjóðarleikvangi, en tækifæri séu til staðar til að halda aðra viðburði þar og kemur tónleikahald af alvöru stærðargráðu fyrst upp í huga hennar.

Þorgerður bendir á að hún sé, eins og þúsundir annarra, hundfúl með að hafa ekki náð að festa kaup á miða á leik íslenska karlalandsliðsins í knattspyrnu gegn Kósóvó á Laugardalsvelli í kvöld. Um er að ræða lokaleik liðsins í I-riðli undankeppni Heimsmeistaramótsins í knattspyrnu. Vinni íslenska liðið leikinn gulltryggir það efsta sæti riðilsins og farseðil á úrslitakeppni HM.

Þorgerður segist gera sér grein fyrir því að þessi hvað þessi umræða kunni að hafa í för með sér, þar á meðal allskyns samanburð við önnur mjög mikilvæg verkefni á sviði innviðauppbyggingar, en segir eitt ekki útiloka annað. 

„Nýr fjölnota þjóðarleikvangur í Laugardal er verkefni sem er mjög vel til þess fallið að vera einkaframkvæmd sem nýtur stuðnings ríkis og borgar. Eðli málsins samkvæmt mun ekki seljast upp á alla íþróttaviðburði sem fram fara á vellinum en ef rétt er staðið að málum þá eru mikil tækifæri fólgin í ýmiskonar öðrum viðburðum sem styrkja rekstrargrundvöll slíks mannvirkis. Tónleikahald af alvöru stærðargráðu kemur fyrst upp í hugann en margt annað kemur til greina eins og við þekkjum erlendis frá. Þar spilar auðvitað ferðmannastraumurinn og áhugi heimsins á Íslandi lykilhlutverk,“ skrifar Þorgerður. 

Hún segir rekstur vallarins í óásættanlegan, sama hvernig á það er litið. 

„Hann stendur ekki undir sér fjárhagslega, leikmenn og áhorfendur eru óánægðir og aðstaða fyrir fjölmiðla og aðra hlutaðeigandi er slök ef frá er talið skrifstofuhúsnæði KSÍ. Það er því klárt mál að eitthvað verður að gera. Nú er lag að byggja nýjan völl fyrir íþróttafólkið okkar, þjóðina og aðra sem sækja höfuðborgina okkar heim. Verum óhrædd við að leyfa einkaframtakinu að njóta sín í verkefni sem þessu.“ 

Uppi hafa verið hugmyndir um að reisa nýjan þjóðarleikvang sem myndi rúma 20 þúsund manns í sæti, sem Geir Þorsteinsson, fyrrverandi formaður Knattspyrnusambands Íslands, talaði mikið fyrir.