Karabatic-bræðurnir gætu misst af EM vegna fimm ára gamals veðmálahneykslis

Frönsku handboltabræðurnir Nikola og Luka Karabatic gætu misst af EM í janúar vegna veðmálahneykslisins sem skók franskan handbolta fyrir fimm árum.

Árið 2012 voru leikmenn Montpellier, sem Karabatic-bræðurnir léku með á þeim tíma, sakaðir um að hafa hagrætt úrslitum í leik gegn Cesson-Rennes í frönsku úrvalsdeildinni.

Montpellier tapaði leiknum óvænt en seinna kom í ljós að óvenju margir höfðu veðjað á móti liðinu í þessum leik. Meðal þeirra voru ættingjar og vinir Karabatic-bræðranna.

Málinu var lokað 2015 en hefur nú verið opnað á nýjan leik. Karabatic-bræðurnir mættu fyrir dóm á mánudaginn en úrskurður í málinu verður kveðinn upp innan tveggja vikna.

Samkvæmt frönskum fjölmiðlum gætu bræðurnir verið settir í tveggja ára bann frá landsliðinu og myndu þ.a.l. missa af EM í Króatíu.