Telegraph: Van Dijk á leið til Liverpool fyrir 75 milljónir punda

Hollenski miðvörðurinn Virgil van Dijk gengur í raðir Liverpool frá Southampton þegar félagaskiptaglugginn opnar á mánudaginn. The Telegraph greinir frá.

Liverpool borgar 75 milljónir punda fyrir Van Dijk sem verður dýrasti varnarmaður allra tíma.

Liverpool eltist við Van Dijk í sumar en ekkert varð af félagaskiptunum. Manchester City og Chelsea voru einnig á eftir Hollendingnum en svo virðist sem Liverpool hafi unnið kapphlaupið um hann.

Samkvæmt frétt The Telegraph fær Van Dijk um 180.000 pund í vikulaun hjá Liverpool.

Van Dijk hóf ferilinn hjá Groningen en gekk í raðir Celtic 2013. Hann lék í tvö ár með skoska liðinu áður en hann fór til Southampton 2015.