Sveinn Aron lánaður frá Val til Aftureldingar og mætir Val á morgun

Afturelding hefur fengið hornamanninn Sveinn Aron Sveinsson lánaðan frá Val og gert við hann skammtímasamning út árið en hann spilar því næstu fimm leiki með Mosfellingum. Þetta staðfestir Einar Andri Einarsson, þjálfari Aftureldingar, við Vísi. Einar er búinn að missa tvo örvhenta leikmenn í erfið meiðsli á síðustu dögum.

Sveinn Aron var lykilmaður Íslandsmeistaraliði Vals á síðustu leiktíð en hefur svo ekkert verið með Valsliðinu í vetur. Hann er á samningi hjá Val og hefur verið að spila með U-liðinu í Grill 66-deildinni en hann spilaði einmitt leik með því á móti Mílunni á föstudaginn.

Þessi öflugi hornamaður er mikil markamaskína en hann skoraði 79 mörk í 26 leikjum með Val í Olís-deildinni á síðustu  leiktíð og var svo einn af máttarstólpunum í úrslitakeppninni þar sem Valsmenn fóru alla leið og unnu FH í fimm leikja úrslitarimmu.

Afturelding er búin að skila inn öll nauðsynlegum pappírum og sagðist Einar Andri ekki búast við öðru en að Sveinn Aron yrði með þegar Mosfellingar mæta einmitt uppeldisfélagi hans, Val, í beinni útsendingu á Stöð 2 Sport HD annað kvöld.

Ástæðan fyrir því að Afturelding er að sækja Svein eru meiðsli á hægri vængnum. Birkir Benediktsson er brotinn á þumalfingri en það eru meiðsli sem hann hefur áður glímt við. Meiðslin eru þó ekki jafn alvarleg og áður, að sögn Einars Andra, en hann verður frá fram að áramótum.

Þá er Gestur Ingvarsson tábrotinn en hann hefur leyst af í hægra horninu undanfarin ár og gert það vel. Búast má við því að Einar Andri færi hornamanninn Árna Braga Eyjólfsson í hægri skyttuna og Sveinn Aron taki sér stöðu í hægra horninu í næstu leikjum.