Hamilton: Þrjár keppnir eftir, þrjár til að vinna

Lewis Hamilton vann sinn fimmta kappakstur í Texas af sex keppnum sem hafa verið haldnar þar í Formúlu 1. Hver sagði hvað eftir keppnina?

„Ég er hress, aðstæður hér í dag voru mjög skemmtilegar. Vindurinn var þannig í dag að við gátum beitt okkur af mikilli hörku. Þetta er orðin mín uppáhalds braut. Ég bjóst ekki við því að hafa þennan hraða fram yfir Sebastian í dag. Það eru þrjár keppnir eftir og þrjár til að vinna,“ sagði Hamilton. Hann hefur þá náð 66 stiga forskoti í heimsmeistarakeppni ökumanna á Sebastian Vettel.

Hamilton þarf núna einungis að ljúka keppninni í Mexíkó í fimmta sæti eða ofar og hann tryggir sér sinn fjórða heimsmeistaratitil ökumanna, óháð því hvað Vettel gerir.

„Við vorum auðvitað ánægð með að ná fram úr Lewis í ræsingunni en við sáum svo fram á að geta ekki haldið aftur af honum. Ég var í einskismanns landi þegar hann var kominn fram úr. Ég ákvað þá að reyna að gera eitthvað annað. Mercedes voru bara fljótari en við í dag, það verður bara að viðurkennast,“ sagði Vettel á verðlaunapallinum.

„Ég var auðvitað mjög vonsvikinn að missa þriðja sætið í lok keppninnar. Bíllinn hafði verið góður alla keppnina og ég þurfti bara að spara smá eldsneyti undir lokin en annars gekk þetta vel,“ sagði Kimi Raikkonen á verðlaunapallinum.

„Það er rangt að refsa Max [Verstappen] fyrir þetta, bílar hafa verið að fara út af alla helgina og engum verið refsað. Þetta er ekki rétt ákvörðun,“ sagði Christian Horner, liðsstjóri Red Bull.

„Ég er svo kátur núna, þetta er okkar fjórði og við erum svo stolt af árangri okkar. Lewis er á toppi ferilsins, ég get samt ekki bent á hann sem þann besta innan liðsins. Heildin hefur staðið svo ótrúlega vel það eru svo margir sem eru á bakvið liðið sem þið sjáið hér. Allir í liðinu hafa lagt sig fram, það þarf allt að smella saman í svona stóru liði,“ sagði Toto Wolff, liðsstjóri Mercedes.

„Það hafa allir verið að misnota brautarmörk. Bottas notaði þetta sem vörn gegn mér og það var engin refsing gagnvart honum. Þetta er ekki gott fyrir íþróttina. Við náðum góðri keppni og við verðum að finna betri lausn á þessu. Þetta er heimskuleg niðurstaða,“ sagði Max Verstappen sem varð fjórði í keppninni með refsingu, hann kom þriðji í mark en tók á ólöglegan hátt fram úr Raikkonen.

„Ég var búinn að fá skilaboð um að skipta á honum og þessum stillingum og það var ekki til að gera bílinn hraðari heldur til að reyna að halda honum gangandi. Svo dó hann bara,“ sagði Daniel Ricciardo á Red Bull. Hann varð að hætta keppni í dag á 16. hring.