Daniel Ricciardo fljótastur á föstudegi í Singapúr

Daniel Ricciardo á Red Bull var fljótastur á báðum æfingum dagsins fyrir Singapúr kappaksturinn í Formúlu 1 sem fer fram um helgina.

Fyrri æfingin

Sebastian Vettel á Ferrari varð annar á æfingunni á eftir Ricciardo. Max Verstappen, liðsfélagi Ricciardo varð þriðji og Lewis Hamilton á Mercedes, efsti maðurinn í heimsmeistarakeppni ökumanna varð fjórði. Sergio Perez á Force India var svo fimmti á undan Valtteri Bottas. Bottas var síðasti maðurinn til að ná að vera innan við sekúndu á eftir Ricciardo.

Sean Gelael tók sæti Carlos Sainz á æfingunni og varð 18. Hann var á undan Sauber ökumönnunum sem ráku lestina á æfingunni.

Almennt þurfti tvo upphitunarhringi til að ná almennilegum hita í últra-mjúku dekkin. Þess má því vænta í tímatökunni að ökumenn nýti sér þá þekkingu.

Seinni æfingin

Ricciardo var aftur fljótastur á seinni æfingunni, þar var hann þó í sérflokki. Verstappen á Red Bull var rúmlega hálfri sekúndu á eftir liðsfélaga sínum. Þar á eftir kom Hamilton sem var 0,7 sekúndum á eftir Ricciardo. Hamilton var einnig síðasti ökumaðurinn sem var innan við sekúndu á eftir Ricciardo.

Ferrari menn voru í vandræðum á seinni æfingunni. Kimi Raikkonen varð níundi, næstum tveimur sekúndum á eftir Ricciardo á meðan Vettel varð 11. 2,2 sekúndum á eftir Ricciardo. Vettel missti afturendabílsins í varnarvegg þegar hann reyndi að setja nýjan hraðan tíma. Eftir það einbeitti hann sér að lengri aksturslotum.

Nico Hulkenberg sýndi og sannaði yfirburði sína yfir liðsfélaga sínum, Jolyon Palmer á æfingunni. Hulkenberg var 1,4 sekúndum fljótari en Palmer sem verður líklegast ekki með Renault liðinu mikið lengur.

Bein útsending frá tímatökunni í Singapúr hefst klukkan 12:50 á morgun á Stöð 2 Sport 2. Bein útsending frá keppninni hefst svo klukkan 11:30 á sunnudag, á Stöð 2 Sport 2.

Hér að neðan má sjá öll helstu úrslit helgarinnar á gagnvirku brautarkorti.