Tryggvi: Eins og venjulega taka lið fram úr okkur í 3. leikhluta

Tryggvi Snær Hlinason spilaði 15 mínútur í tapinu fyrir Frökkum á EM í körfubolta í dag. Bárðdælingurinn skoraði fimm stig og tók fjögur fráköst í leiknum.

„Við mættum vel stemmdir en Frakkarnir eru bara þetta mikið betri en við,“ sagði Tryggvi eftir leikinn í dag.

Ísland var sjö stigum undir, 42-47, eftir fyrri hálfleikinn sem var sá besti hjá liðinu á mótinu.

„Við byrjuðum ógeðslega vel og héldum í við þá. En eins og venjulega taka lið fram úr okkur í 3. leikhluta,“ sagði Tryggvi sem fékk að glíma við stóra og sterka leikmenn Frakka.

„Það er gaman og erfitt. Maður reynir sitt besta,“ sagði miðherjinn öflugi.

Ísland á tvo leiki eftir á EM; gegn Slóveníu og Finnlandi.

„Við eigum tvo leiki eftir og ætlum að klára þá með stæl. Við erum hérna og ætlum að njóta þess,“ sagði Tryggvi að lokum.