Verslanir gefa ekki lengur upplýsingar

Rannsóknasetur verslunarinnar hefur hætt birtingu veltuvísitölu dagvöruverslana og nokkurra annarra flokka smásölu. Í tilkynningu frá RVS segir að aðilar með mikla markaðshlutdeild á smásölumarkaði hafi ákveðið að hætta miðlun á upplýsingum um veltutölur sínar.

Smásöluvísitalan hefur verið birt mánaðarlega frá stofnun RVS árið 2004. Frumkvæðið að birtingunni kom upphaflega frá verslunum í landinu og var helsti tilgangurinn að auka gagnsæi mánaðarlegrar þróunar í einstökum tegundum verslunar.

Þar sem verslanir vilja ekki lengur veita þessari upplýsingar er þeim sjálfhætt. RVS ætlar að leita annarra leiða við öflun skammtímaupplýsinga um veltu verslunar eftir vöruflokkum.