Innlent

Brotahrina sem þurfi að stöðva

Sunna Karen Sigurþórsdóttir skrifar
Aldo Viðar Bae er sakaður um að hafa haft fé af fjölda fólks.
Aldo Viðar Bae er sakaður um að hafa haft fé af fjölda fólks.

Hæstiréttur hefur staðfest að Aldo Viðar Bae, sem áður hét Halldór Viðar Sanne, skuli sæta gæsluvarðhaldi næstu fjórar vikurnar, eða til 15. ágúst næstkomandi, vegna meintra fjársvika og fjárdráttar. Aldo Viðar, sem er dæmdur fjársvikari, hefur verið í haldi lögreglu í tæpa fjóra mánuði, eða frá handtöku 27. mars. Hann er sakaður um að hafa haft fé af fjölda fólks með ólögmætum hætti og segir lögreglustjóri í greinargerð sinni um málið að stöðva þurfi þessa brotahrinu.

Brotin beindust gegn fólki í erfiðri stöðu
Aldo sætir ákæru fyrir fjársvik, tilraun til fjársvika og fjárdráttar. Hann neitaði sök þegar mál hans var þingfest í Héraðsdómi Reykjaness fyrr í þessum mánuði.

Aldo er grunaður um að hafa haft fé af fjölda aðila með ólögmætum og refsiverðum hætti og meðal annars svikið út fé með blekkingum. Um er að ræða fjársvika- og fjárdráttarbrot sem beinast að fólki sem hafði verið í erfiðri stöðu vegna erfiðs leigumarkaðar, að því er segir í greinargerð lögreglu á vef Hæstaréttar.

Áframhaldandi gæsluvarðhald nauðsynlegt
„Að mati lögreglustjóra sé um að ræða brotahrinu sem þurfi að stöðva og því sé nauðsynlegt að ákærði sæti gæsluvarðhaldi þar til dómur liggur fyrir í máli hans. Tekur lögreglustjóri sérstaklega fram að ákærði hafi áður komið við sögu lögreglu í tengslum við fjársvik og hann hlotið dóma vegna fjársvika, bæði hér á landi og í Danmörku,“ segir í greinargerðinni.

Fréttablaðið greindi frá meintum svikum Aldos Viðars þann 18. mars síðastliðinn en þá sagði Bergljót Snorradóttir farir sínar ekki sléttar eftir viðskipti við hann. Kvaðst hún hafa greitt honum leigu fyrirfram fyrir einbýlishús í Njarðvík sem Aldo átti ekki heldur var sjálfur með í leigu. Í kjölfarið ræddi Fréttablaðið við fleira fólk sem taldi sig hlunnfarið í viðskiptum við Aldo.


Tengdar fréttir

Halldór Viðar Sanne ákærður fyrir fjársvik

Gefin hefur verið út ákæra á hendur Halldóri Viðar Sanne fyrir fjársvik, tilraun til fjársvika og fjárdrátts en hann hefur verið í gæsluvarðhaldi samfleytt frá 28. mars síðastliðnum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.