Rauði krossinn nýtir fé úr neyðarsjóði til erlendra verkefna í fyrsta sinn síðan 2005

Rauði krossinn mun stórauka fjárveitingar til Alþjóða Rauða krossins í Suður-Súdan, Sómalíu og Jemen. Tilefnið er mikill fæðuskortur á svæðinu sem og yfirvofandi hungursneyð. Upphæðin nemur 197 milljónum króna sem fer beint til neyðaraðstoðar.

Fjárhæðin kemur meðal annars úr neyðarsjóði Rauða krossins, sem álitinn er tryggingasjóður vegna áfalla sem íslenskt samfélag og Rauði krossinn á Íslandi verður fyrir. Fé úr sjóðnum hefur ekki verið notað til erlendra verkefna síðan árið 2005 þegar Pakistan var veitt neyðaraðstoð vegna jarðskjálfta sem þar varð.  Sjóðurinn hefur þó verið notaður vegna hamfara innanlands. Einnig er notast við styrktarfé frá mannvinum Rauða krossins sem og styrki frá Utanríkisráðuneytinu.

Samkvæmt fréttatilkynningu frá Rauða krossinum er ástandið í þessum löndum til komið vegan átaka sem þar hafa geysað en þurrkar hafa einnig verið tíðir. Hungursneyð hefur þó ekki verið lýst yfir sem stendur að undanskildum ákveðnum svæðum í Suður- Súdan.  Síðast var lýst yfir hungursneið í Sómalíu árið 2011.

Börn alvarlega vannærð

Kristín S. Hjáltýsdóttir, framkvæmdastjóri Rauða krossins hefur verið í Sómalíu og séð hversu slæmt ástandið er með eigin augum.

„Ástandið er hræðilegt og miklu verra en fólk almennt gerir sér grein fyrir. Börn, þungaðar konur og gamalmenni verða verst úti í svona ástandi og það er hópurinn sem við reynum mest að hlúa að og veita stuðning. Mér fannst verst að horfa á lítil börn, nokkurra mánaða, með alvarlega vannæringu en það var líka huggum harmi gegn að horfa á starfsmenn og sjálfboðaliða Rauða hálfmánans í Sómalíu bjarga lífi þessara barna með jarðhnetumauki og bólusetningum. Við erum að bjarga lífum á hverjum einasta degi og það kostar oft ekki nema þúsund krónur að koma vannærðu barni til heilbrigðis með þessu jarðhnetumauki. Sá sem leggur þannig þúsund krónur til Rauða krossins er að bjarga barni og hver Mannvinur Rauða krossins bjargar meira en tíu börnum. Og það eru einmitt Mannvinir Rauða krossins, almenningur og íslensk stjórnvöld sem hafa gert okkur kleift með okkar framlagi að bjarga þúsundum og kannski tugþúsundum barna. Það er ekki lítið og við getum verið stolt af því,“ segir Kristín og vitnar til þjóðarsálar Íslendinga sem hún segir skilja ástand sem þetta enda ekki sé langt síðan Ísland var fátækt ríki.

„Ísland fékk í raun umfangsmikla efnahagsaðstoð í kjölfar seinni heimsstyrjaldar sem gerði okkur kleift að brjótast úr fátækt og til vel stæðs samfélags. Við erum því lifandi og gott dæmi um hvernig utanaðkomandi stuðningur skiptir höfuðmáli til að verða sjálfbjarga og geta svo lagt að mörkum til annarra þjóða sem standa í þeim sporum sem við áður gerðum að hluta til,“ segir Kristín.