„Ísleifur B. Þórhallsson hjá Senu, sem stendur fyrir tónleikum Sissel, sagði við Fréttablaðið á dögunum að hann teldi ekki of snemmt að hefja sölu á miðunum. Miðasala hófst 18. maí eða rúmum sjö mánuðum fyrir jól.
„Svona er þetta gert í Skandínavíu. Þar er hún farin í sölu og allt uppselt,“ sagði Ísleifur.

„Þetta er Sissel og hún er stjarna,“ segir hann. Tónleikar Sissel verða þann 20. desember. Miðaverð á tónleikana er frá níu þúsund krónum í ódýrustu sætin upp í sextán þúsund krónur í bestu sætin.
Sigga Beinteins verður með tvenna jólatónleika þá 8. og 9. desember en hún er einn þeirra listamanna sem hægt hefur verið að ganga að sem vísu að bjóði upp á tónleika um jólin.
Í framhaldinu má reikna með því að hverjir jólatónleikarnir á fætur öðrum verði auglýstir enda hefur framboðið af slíkum tónleikum verið mikið undanfarin ár.
Þar hafa þó fáir getað keppt við Baggalútsmenn sem seldu upp á tólf tónleika í Háskólabíó á aðeins einni klukkustund í fyrra. Þá var miðaverð átta þúsund krónur á tónleikana.