Viðskipti innlent

Hagar leita til dómstóla vegna Korputorgssölu

Haraldur Guðmundsson skrifar
Hagar opnuðu verslun Bónuss á Korputorgi í mars 2009.
Hagar opnuðu verslun Bónuss á Korputorgi í mars 2009. vísir/eyþór
Verslunarfyrirtækið Hagar hefur stefnt bæði fyrrverandi og núverandi eiganda Korputorgs vegna meintra vanefnda á samkomulagi um forkaupsrétt á húsnæði Bónuss í verslunarkjarnanum. Forstjóri Haga segir fyrirtækið ekki ætla að loka versluninni en nýr eigandi Korputorgs hefur áform um að koma mestallri starfsemi heildsölu- og framleiðslufyrirtækisins Íslensk-Ameríska (Ísam) undir eitt þak og leigja út verslunarrými til smásölu.



„Málið snýst um forkaupsrétt sem er skýlaus og fyrirvaralaus í leigusamningi sem er ekki virtur. Við gerum enga athugasemd við söluna á Korputorginu en eigum aftur á móti forkaupsrétt á þeim hluta sem snýr að Bónus og viljum fá að nýta hann. Það er okkar ætlun að reka verslunina þarna áfram,“ segir Finnur Árnason, forstjóri Haga.

Finnur Árnason, forstjóri Haga
Hagar stefndu félögunum SMI ehf. og Korputorgi ehf. eftir að tilkynnt var um kaup Kristins ehf., móðurfélags Ísam, á verslunarkjarnanum í október í fyrra. Munnlegur málflutningur fyrir Héraðsdómi Reykjavíkur hófst á þriðjudag.



Fasteignafélagið Korputorg ehf. heldur utan um rekstur verslunarkjarnans og keypti Kristinn ehf. það í október. Til stend­ur að flytja mestalla starf­semi Ísam í hús­næðið á næstu árum og þá fyrirtækin Myll­una, Ora, Frón og Fast­us. Kristinn er í eigu Guðbjargar Matthíasdóttur, útgerðarkonu í Vestmannaeyjum, og fjölskyldu.



„Það er búið að leigja út allt Korputorgið og þar verður blönduð starfsemi og það er gert ráð fyrir að þar verði smásala að hluta til. Ég á eftir að taka formlegar viðræður við Bónus en það er leigusamningur í gildi og við erum að leita að góðum og traustum leigutökum,“ segir Sævar Þór Ólafsson, framkvæmdastjóri Korputorgs ehf., og vill að öðru leyti ekki tjá sig um málið. 



SMI er í eigu erlenda sjóðsins The Calabry Trust en upplýsingar um eignarhald hans eru ekki skráðar hjá fyrirtækjaskrá Ríkisskattstjóra. Jákup á Dul Jacobsen, fjárfestir og stofnandi Rúmfatalagersins, er samkvæmt henni stjórnarformaður SMI.



Davíð Freyr Albertsson, fyrrverandi framkvæmdastjóri SMI og fyrrverandi eigandi verslunarkjarnans, vildi ekki tjá sig um málið þegar eftir því var leitað. Ekki náðist í Jákup á Dul Jacobsen. 

Tengd skjöl




Fleiri fréttir

Sjá meira


Mesta hækkun dagsins


Engar hækkanir skráðar í dag

Mesta lækkun dagsins


Engar lækkanir skráðar í dag
Velkomin á Vísi. Þessi vefur notar vafrakökur. Sjá nánar.