VW T-ROC án feluklæða

Volkswagen mun hefja framleiðslu á þessum fremur smáa jepplingi seinna á þessu ári, en segja má að þar fari litli bróðir Tiguan jepplingsins. Ágætar myndir náðust af bílnum á dögunum þar sem hann var í prófunum og víst er að Volkswagen var ekki mikið að fela útlit bílsins því hann var án feluklæða.

T-ROC er 31 cm styttri en 5-sæta Tiguan, 1 cm mjórri og 14 cm lægri. Bíllinn mun bjóðast með nokkrum þriggja og fjögurra strokka vélum og bæði beinskiptur og með DSG sjálfskiptingu. Einnig má velja á milli framhjóladrifs og fjórhjóladrifs. T-ROC situr á sama MQB undirvagni og er undir Golf og bíllinn er ámóta stór og hann en þó hærri frá vegi.

Bíllinn verður framleiddur í Portúgal, í verksmiðju Volkswagen í Palmela. Heyrst hefur að framleiðsla hefjist á bílnum í ágúst og víst er að hann verður sýndur almenningi á bílasýningunni í Frankfurt mánuði síðar. Hann ætti svo að bjóðast kaupendum skömmu fyrir áramót.

Ekki er víst að allir verði hrifnir af þeim breytingum sem T-ROC hefur fengið í ytra útliti frá þeim tilraunabíl sem Volkswagen kynnti í fyrstu og sést hér á mynd. Þar fór afar sportlegur þriggja dyra bíll á stórum felgum, en framleiðslubíllinn er praktískari 5 hurða bíll á talsvert minni felgum og dekkjum og það bitnar sannarlega nokkuð á útlitinu. Samt er hér um nokkuð laglegan bíl að ræða.