Guðjón: Erfitt að finna veikleika í sóknarleik Lazarov

Landsliðsfyrirliðinn Guðjón Valur Sigurðsson þekkir vel til makedónska liðsins og ekki síst til stjörnu liðsins, Kiril Lazarov, en þeir spiluðu saman hjá Barcelona.

„Hann er ein af bestu hægri skyttunum í boltunum. Hann er klárlega maðurinn hjá þeim sem við þurfum að stöðva,“ segir Guðjón og bætir við að veikleiki hans sé varnarleikur enda spili hann varla vörn.

„Hann er með gríðarlega gott auga og frábær skotmaður í sókn. Það er erfitt að finna veikleika í hans sóknarleik. Við þurfum að setja pressu á hann svo hann fái eins lítinn tíma og mögulegt er. Þetta er flottur karakter og mikill atvinnumaður.“

Það er allt undir hjá strákunum okkar í dag en hver er lykillinn að því að vinna Makedónana?

„Góð vörn, markvarsla, hraðaupphlaup og agaður sóknarleikur. Þeir spila mikið sjö á móti sex og við höfum ekki lent mikið í því á þessu móti. Það þarf að ná frumkvæði er maður spilar einum færri í vörn. Ef við höldum uppi sömu vörn og markvörslu þá held ég að við séum í góðum málum. Við erum að verða betri í sókninni.“

Ekki missa af neinu sem gerist á HM í Frakklandi. Vísir er með öflugt fréttateymi á mótinu sem færir ykkur allar nýjustu fréttirnar af strákunum okkar. Fylgdu okkur á Facebook, Twitter og Snapchat (sport365).