Brottvikning Atla Rafns hafði ekkert með Medeu að gera

Mikil óvissa ríkir innan Borgarleikhússins eftir að Kristín Eysteinsdóttir vék Atla Rafni Sigurðarsyni leikara frá húsinu um helgina á grundvelli óljósra ásakana sem tengjast metoo-byltingunni. Að sögn Hörpu Arnardóttur leikstjóra tengist brottrekstur Atla Rafns uppfærslunni á Medeu ekki neitt.

Atli Rafn, sem er í ársleyfi frá Þjóðleikhúsinu til að sinna veigamiklum hlutverkum í Borgarleikhúsinu, hefur farið með mikilvægt hlutverk í Kartöfluætunum sem hefur verið til sýninga og stóð til að sýna áfram eftir áramót. Óvissa er um hvort það verður. Þá var Atli Rafn byrjaður að æfa hlutverk Riff Raffs í Rocky Horror, söngleik sem til stendur að setja upp í vor og bundnar eru miklar vonir við. Líkast til verður svigrúm til að bregðast við því með að fá annan leikara til að hlaupa í skarðið.

Verra er þó með Medeu eftir Evrípídes, eitt af lykilverkum leikbókmenntanna, sýningu sem var svo gott sem tilbúin enda hafði staðið til að frumsýna eftir fáeina daga – jólasýning Borgarleikhússins. Æfingar liggja niðri nú og ekki hefur verið gengið frá því hver mun hlaupa í skarðið og fara með stórt hlutverk sem Atli Rafn var búinn að æfa – burðarhlutverk í uppfærslunni. Þá liggur ekki fyrir, eðli máls samkvæmt, hvenær verður frumsýnt. Væntanlega verður komið inná það á starfsmannafundi sem boðað hefur verið til í dag. Víst er að leikhópurinn, sem var á lokametrunum við að ganga frá sýningunni er tættur og miður sín.

Brotvikningin tengist Medeu ekki

Nýlegt viðtal við Kristínu Þóru Haraldsdóttur, sem leikur Medeu, fær aðra merkingu eftir atburði helgarinnar. Til stendur/stóð að kynskipta áhorfendaríminu þannig að konur og karlar sitja ekki saman:

„Kynjaskiptur salur styður við hugmyndafræði og áherslur sýningarinnar.“ Þá segir Kristín Þóra jafnframt: „„Og ég hef spurt mig, hvað þarf til að eitthvað breytist varðandi ofbeldi í garð kvenna? #metoo byltingin snýst ekki um hefnd heldur réttlæti og kannski er Medea í grunninn að leita að einhvers konar réttlæti.“

Vísir ræddi við Hörpu Arnardóttur leikstjóra sýningarinnar en hún vildi sem allra minnst tjá sig um málið, sagði það flókið og viðkvæmt. „Ég get þó sagt að málið tengist Medeu og því verkefni ekki neitt,“ segir Harpa og vísar þá til þeirra ásakana sem eru grundvöllur brottvikningarinnar. Harpa sagði að öllum spurningum vegna málsins yrði að beina til leikhússins.

Óljósar upplýsingar vatn á myllu Gróu

En, þar stendur hnífurinn í kúnni. Kristín Eysteinsdóttir hefur forðast fjölmiðla sem heitan eldinn. Og athyglisverð er frásögn blaðamanna DV um eltingarleik við leikhússtjórann í gær. Vísir ræddi við formann stjórnar Leikfélags Reykjavíkur í gær. Eggert Benedikt Guðmundsson vildi hins vegar ekki tjá sig neitt né svara neinum spurningum. Ætla má að þetta sé verulegt tjón fyrir leikhúsið, meta má að sýningin kosti í kringum 30 milljónir, bara við að koma henni á sviðið. Leikhúsið verður nú af tekjum vegna miðasölu en sýningin hefur verið tekin úr sölu. En, Eggert Benedikt vildi ekki veita neinar upplýsingar því tengdu.

Í yfirlýsingu frá Borgarleikhúsinu í gær segir að leikhússtjóri og stjórn hafi verið einhuga um brottvikninguna en meira kemur þar ekki fram. Atli Rafn sendi jafnframt frá sér yfirlýsingu eftir að Vísir hafði greint frá málinu. Og þar kemur fram að um sé að ræða nafnlausar ásakanir, hann viti ekki hvað felst í þeim ásökunum og hann geti því ekki tjáð sig um þær. 

Atli Rafn snýr til baka í Þjóðleikhúsið

Meðan leyndarhyggjan ræður ríkjum og Borgarleikhúsið neitar að gefa upplýsingar um á hverju þessar harkalegu aðgerðir byggjast grassera sögusagnirnar. Fram hefur komið að þetta tengist metoo-byltingunni en spurningarnar sem ekki fást svör við eru í grófum dráttum þær að leikhúsið hafi brugðist of harkalega við sögum sem sagðar eru í lokuðum Facebook-hópum eða að um sé ræða nýja og alvarlega ásökun um kynferðislegt ofbeldi af hálfu Atla Rafns.

Það breytir ekki því að fyrir liggur að ekki hefur verið gætt að grundvallaratriðum réttarríkisins þeim að hver maður skuli saklaus uns sekt sannast. Atli Rafn hefur samkvæmt því sem fyrir liggur ekki nákvæmar upplýsingar um hvað hann er sakaður um. Hvað þá að hann honum hafi gefist kostur á að grípa til varna, enn ef marka má yfirlýsingu Atla Rafns. Vísir hefur heimildir fyrir því að lögmaður Atla Rafns sé að fara í saumana á málinu og skoða réttarstöðu hans.

Ari Matthíasson Þjóðleikhússtjóri, segir að meðan ekkert liggi fyrir í þeim efnum sé ljóst að Atli Rafn hljóti að taka upp þráðinn þar sem frá var horfið hjá Þjóðleikhúsinu. Þetta kom fram á mbl.is. Ari segist ekki eiga annan kost í stöðunni. Þjóðleikhúsið er ríkisstofnun og þarf að hlíta eðlilegum verkferlum. Borgarleikhúsið skilgreinist hins vegar sem sjálfseignastofnun og virðist geta hagað sínum málum eins og þau telja best henta.

Árétting klukkan 17:44

Í þessari frétt segir að Atla Rafni hafi ekki verið gerð grein fyrir þeim ásökunum sem leiddu til brottvikningar hans. Var þar vísað til stuttrar yfirlýsingar hans sjálfs um málið.

Eftir að fréttin birtist lét Kristín Eysteinsdóttir leikhússstjóri Borgarleikhússins fréttamann RUV hafa það eftir sér að Atla Rafni hafi verið gerð grein fyrir ásökununum og stendur því þar orð gegn orði.

Vísir greindi frá þessu fyrr í dag en ekki hefur tekist að ná í leikhússtjórann og skilaboðum hefur hún svarað á þá leið að vísa til fyrri yfirlýsingar leikhússins.