Albertína Friðbjörg ráðin framkvæmdastjóri EIMS

Albertína Friðbjörg Elíasdóttir hefur verið ráðin framkvæmdastjóri EIMS.

Albertína er landfræðingur og félagsfræðingur að mennt og hefur starfað sem verkefnastjóri atvinnumála hjá Akureyrarbæ undanfarin ár. Þá hefur hún einnig starfað sem verkefnastjóri hjá Nýsköpunarmiðstöð Íslands á Ísafirði og verkefnastjóri og kennari hjá Háskólasetri Vestfjarða.

Í tilkynningu frá KPMG, sem hélt utan um ráðningarferlið, kemur fram að að EIMI standi Eyþing – samtök sveitarfélaga í Eyjafirði og Þingeyjarsýslum, Landsvirkjun, Norðurorka og Orkuveita Húsavíkur ásamt Íslenska ferðaklasanum, Íslenska jarðvarmaklasanum og atvinnuþróunarfélögum á svæðinu.

„Stofnfundur EIMS var haldinn í byrjun júní s.l. en markmið verkefnisins er að stuðla að aukinni sjálfbærni samfélaga á svæðinu með fjölbreyttari nýtingu orkuauðlinda á Norðausturlandi og samspili samfélags, umhverfis, auðlinda og efnahags. EIM er ætla að skapa jarðveg fyrir nýsköpunar og þróunarverkefni með áherslu á verðmætasköpun í víðum skilningi ásamt því að auka meðvitund almennings og fyrirtækja á málaflokknum.

Verkefninu er sérstaklega ætlað að ýta undir rannsóknir og nýtingu á svo nefndum hliðarstraumum í orkuvinnslu, iðnaði, landbúnaði o.s.frv.  Hliðarstraumar geta verið fólgnir jafnt í ónýttri orku og ónýttu hráefni sem í dag fellur ónýtt til við hlið hinnar hefðbundnu framleiðslu.  Þekkt dæmi í þessum efnum er ónýtt varmaorka í raforkuframleiðslu og iðnaði og ónýttar hliðarafurðir í iðnaði, fiskvinnslu og landbúnaði.

Miklar vonir eru bundnar við að með verkefninu megi leggja grunn að margbreytilegri nýsköpun og þar með atvinnusköpun á svæðinu.  Horft er til þess að til samstarfsins komi aðilar í ferðaþjónustu, iðnaði og framleiðslu hverskonar og rannsóknaraðilar m.a. úr skólasamfélaginu.  Síðast en ekki síst er horft til þess að með þessu starfi verði til fjárfestingartækifæri fyrir jafnt fyrirtæki á svæðinu, fjárfestingarsjóði og aðra fjárfesta jafnt innlenda sem erlenda.

Stofnaðilar leggja til verkefnisins stofnfé að fjárhæð um eitthundrað milljónir og er verkefninu ætlað að standa í a.m.k. þrjú ár,“ segir í tilkynningunni.