Kristinn Þórðarson kosinn formaður SÍK

Aðalfundur Sambands íslenskra kvikmyndaframleiðenda var haldinn fimmtudaginn 26. maí síðastliðinn. Á fundinum var Kristinn Þórðarson, framleiðandi hjá TrueNorth, kosinn formaður félagsins en hann tekur við af Hilmari Sigurðssyni, framkvæmdastjóra GunHill, sem gegnt hefur embættinu síðastliðin fjögur ár.

Í tilkynningu frá SÍK kemur fram að stjórn SÍK fagnar því að mennta- og menningarmálaráðuneytið hafi fundið leið til að deila út fjármagni sem lagt hefur verið til hliðar á fjárlögum frá árinu 2012 þegar ákveðið var að leggja virðisaukaskatt á miðasölu kvikmynda og koma til móts við íslenska kvikmyndagerð með sérstökum miðastyrkjum.

Á fundinum var einnig samþykkt ályktun þess efnis að samtökin hvettu mennta- og menningarmálaráðherra til að ljúka gerð nýs samkomulags um stefnumörkun fyrir íslenska kvikmyndagerð og íslenska kvikmyndamenningu til næstu fimm ára.