Viðskipti innlent

Grænlendingar byggja upp nýtt flugvallakerfi

Kristján Már Unnarsson skrifar
Grænlensk stjórnvöld áforma stórfelldar flugvallaframkvæmdir sem gjörbreyta flugsamgöngum við landið og gætu styrkt tengsl Íslands og Grænlands enn frekar. Fjallað var um málið í fréttum Stöðvar 2 og rætt við Árna Gunnarsson, framkvæmdastjóra Flugfélags Íslands. 

Airbus A-330 breiðþota Grænlandsflugs er að koma frá Kaupmannahöfn til lendingar á flugvellinum í Kangerlussuaq en þetta er aðaltenging Grænlendinga við umheiminn. Hann hét áður Syðri-Straumfjörður og er eini áætlunarflugvöllurinn sem er nægilega stór fyrir farþegaþotur. Hann er þó aðallega millilendingarstaður því þaðan fara flestir farþeganna áfram með smærri vélum eða þyrlum til helstu bæja Grænlands en í Kangerlussuaq er bara 500 manna þorp. 

Það var Bandaríkjaher sem byggði flugvöllinn á stríðsárunum, árið 1941, og þar var bandarísk herstöð allt til ársins 1992. Þótt hann hafi á sínum tíma hentað sem herflugvöllur var staðsetning hans ekki hugsuð út frá grænlensku samfélagi. Það sama gildir um flugvöllinn í Narsarssuaq, sem einnig var byggður af Bandaríkjaher, en liggur fjarri helstu bæjum Suður-Grænlands.

Flugvöllunum fimm er ætlað að þjóna grænlenskum byggðum betur en nú er hægt. Reykjavík liggur vel gagnvart þeim öllum.Grafík/Guðmundur Björnsson.
Þessu vilja grænlensk stjórnvöld breyta og hafa nú markað þá stefnu að byggja upp flugvallakerfi sem betur þjónar Grænlendingum. Lengja á brautirnar í Ilulissat og höfuðstaðnum Nuuk og gera nýja flugvelli í Qaqortoq, Tasiilaq (áður Angmassalik) og Ittoqqortoormiit við Scoresbysund. Brautirnar í Nuuk og Ilulissat eru aðeins um 900 metra langar, og taka því aðeins við minni flugvélum, en markmiðið er að lengja þær svo þær geti tekið við farþegaþotum. 

Flugfélag Íslands flýgur til fimm staða á Grænlandi og þar fylgjast menn grannt með þróun mála. Árni Gunnarsson framkvæmdastjóri segir þessar hugmyndir geta breytt landslagi verulega í samgöngum Grænlands. 

„Í því liggja jafnvel mun meiri tækifæri fyrir okkur heldur en hingað til,“ segir Árni.

 

Árni Gunnarsson, framkvæmdastjóri Flugfélags Íslands, í viðtali á flugvellinum í Kangerlussuaq.Stöð 2/Friðrik Þór Halldórsson.
Þótt undirbúningsframkvæmdir séu hafnar er fjármögnun ekki í höfn og því er óvíst hvenær þeim lýkur. Flugfélagsmenn telja að lengingar brautanna í Nuuk og Ilulissat gætu lækkað fargjöldin til Grænlands. 

„Þetta er tiltölulega langt flug á litlum vélum, sem við höfum verið að bjóða upp á hingað til. En með þessum stækkunum á flugbrautum er hægt að fljúga stærri flugvélum inn. Þannig að möguleikarnir skapast í því að vera með stærri einingar, þá getur sætiskostnaðurinn lækkað," segir Árni.


Tengdar fréttir

Vilja tappa af ferðamannastrauminum til Íslands

Næstu nágrannar Íslands á norðurhveli, Grænlendingar, sjá mikil tækifæri í frekari opnun norðurslóða. Utanríkis- og iðnaðarráðherra Grænlands hélt erindi á Arctic Circle ráðstefnunni í dag um framtíð Grænlands.






Fleiri fréttir

Sjá meira


×