Seðlabankinn rökstyður óbreytta stýrivexti

Peningastefnunefnd Seðlabanka Íslands hefur ákveðið að halda vöxtum bankans óbreyttum. Meginvextir bankans, vextir á sjö daga bundnum innlánum, verða því áfram 5,75 prósent. Már Guðmundsson seðlabankastjóri og Arnór Sighvatsson aðstoðarseðlabankastjóri munu skýra frá vaxtaákvörðun nefndarinnar á fundi sem hefst klukkan 10 og verður í beinni útsendingu í spilaranum hér að neðan.

Samkvæmt áætlun Hagstofu Íslands var hagvöxtur í fyrra 4 prósent sem er mjög nærri febrúarspá Seðlabankans. Vísbendingar það sem af er ári gefa jafnframt til kynna að horfur fyrir þetta ár hafi lítið breyst og að útlit sé einnig fyrir kröftugan hagvöxt á næstu misserum segir í tilkynningu frá nefndinni.

Verðbólga mældist 2,2 prósent í febrúar og hefur aukist um ríflega 1 prósentu frá því sem hún var fyrir ári. „Sem fyrr vegast þar á innlendur verðbólguþrýstingur og innflutt verðhjöðnun á alþjóðlegum vörumörkuðum. Áfram er útlit fyrir að verðbólga verði undir markmiði fram eftir ári en horfur eru óvissar, m.a. varðandi innflutningsverðlag,“ segir í tilkynningunni.

„Alþjóðleg verðlagsþróun og sterkari króna hafa veitt svigrúm til að hækka vexti hægar en áður var talið nauðsynlegt. Það breytir hins vegar ekki því að miðað við spá Seðlabankans er líklegt að auka þurfi aðhald peningastefnunnar frekar á næstu misserum í ljósi vaxandi innlends verðbólguþrýstings. Hve mikið og hve hratt það gerist ræðst af framvindunni,“ segir peningastefnunefnd.

Fundinum sem hófst klukkan tíu er nú lokið.