Helsti keppinautur Anítu á ótrúlega þrautagöngu að baki

Aðeins sjö ár eru síðan að nýkrýndur heimsmeistari kvenna í 800 m hlaupi, hin suður-afríska Caster Semenya, var beðin um að taka kynjapróf af Alþjóðafrjálsíþróttasambandinu.

Málið vakti gríðarlega athygli á sínum tíma enda hafði nokkuð þessu líkt aldrei áður komið fram á stóra sviði íþróttanna - að íþróttakona þyrfti að sanna að hún væri í raun og veru kona. Það þurfti hún enn fremur að gera með augu heimsins á sér.

„Ég varð heimsmeistari en náði í raun aldrei að fagna þeim árangri,“ sagði Semenya í viðtali við BBC í fyrra en það má sjá í heild sinni hér.

Í því viðtali segist Semenya vera blátt áfram manneskja, sönn sjálfri sér og einlæg. Hún sé harðgerð og hafi alltaf leitast eftir því að finna áskoranir.

Semenya var einungis átján ára þegar hún vann gull á HM 2009 í Berlín án þess að virðast hafa mikið fyrir því. Hún var langfyrst í mark á 1:55,45 mínútum, rúmum tveimur sekúndum á undan næsta keppanda. Með þessum tíma náði Semenya að bæta sig um átta sekúndur frá árinu áður.

Það var fyrirséð að Semenya myndi drottna yfir þessari grein um ókomin ár en hún hljóp ekki aftur næstu ellefu mánuði og eins og hún sagði sjálf, naut þess aldrei að verða heimsmeistari í íþrótt sinni.

Þann 6. júlí 2010 fékk hún aftur grænt ljós hjá Alþjóðafrjálsíþróttasambandinu að keppa en að baki var afar flókið ferli sem hjó mjög nærri einkalífi hennar og mannréttindum. Í stað þess að verið væri að saka hana um að svindla, var verið að efast um að hún hefði rétt á því að keppa við aðrar konur.

Niðurstöður kynjaprófsins voru aldrei gerðar opinberðar en óstaðfestar fréttir voru víða birtar um niðurstöðurnar og áfram var fjallað um málið um árabil.

Á sama tíma hafði Semenya hægt um sig en kom sér aftur af stað í alþjóðlegum keppnum, hægt og rólega. Hún vann silfur á HM 2011 og Ólympíuleikunum í London 2012 en í bæði skipti tapaði hún fyrir Mariya Savinova frá Rússlandi sem á yfir höfði sér lífstíðarbann fyrir lyfjamisnotkun. Semenya gæti því fengið gullverðlaun frá báðum mótum eftir á.

Sigurtími hennar á HM í Berlín árið 2009 var hennar besti tími á ferlinum þar til að hún hljóp á 1:55,33 mínútum í Mónakó þann 15. júlí síðastliðinn. Það er langbesti tími ársins í greininni og virðist fátt geta komið í veg fyrir að Semenya vinni gull á sínu fyrsta stórmóti síðan í Berlín fyrir sjö árum síðan.

Hún getur einnig verið fyrsta konan til að ógna heimsmeti Jarmila Kratochvliova frá Tékkóslóvakíu. Heimsmet hennar, 1:53,28 mínútur hefur staðið óhaggað í 33 ár. Semenya þyrfti að bæta sinn besta tíma um rúmar tvær sekúndur til að slá metið.

„Ég ætla ekki að hætta að hlaupa út af því hvað fólk segir. Ef fólk er að segja eitthvað um mig verður það bara að koma til mín. Ég ætla ekki að hætta af því að fólk segir að ég líti út eins og karlmaður. Það er þeirra vandamál, ekki mitt,“ sagði Semenya ákveðin í viðtalinu við BBC.

Keppni í 800 m hlaupi kvenna hefst í dag. Caster Semenya keppir í 2. riðli, á fjórðu braut, klukkan 14.02. Fjórtán mínútum síðar keppir Aníta Hinriksdóttir á áttundu braut í fjórða riðli.