Segja niðurskurð bitna á nemendum

Samtök foreldra grunnskólabarna í Reykjavík, SAMFOK, hafa miklar áhyggjur vegna boðaðs niðurskurðar hjá skóla- og frístundasviði á þessu ári. Hagræðingarkrafan á árinu hljóðar upp á 670 milljónir króna. Ekki liggur fyrir hversu mikill niðurskurður lendir á grunnskólunum.

„Við vitum að skólastjórar hafa barist í bökkum við að halda starfseminni gangandi svo vel sé eftir niðurskurð fyrri ára. Frekari niðurskurður mun bitna enn meira á grunnþjónustunni. Mestar áhyggjur höfum við af því að stuðningur við börn með sérþarfir verði ekki nægur,“ segir Bryndís Jónsdóttir, framkvæmdastjóri SAMFOKS.

Skólastjórar hafa áhyggjur af því að fjármagn til reksturs grunnskóla í Reykjavík sé alls ekki í takt við lögboðið hlutverk og skyldur hans. Þeir segja að niðurskurður í kreppunni hafi ekki verið bættur. Enn frekar hafi verið skorið niður síðustu ár. Fjármagnið hafi ekki fylgt launaþróun.

Þorsteinn Sæberg, skólastjóri Árbæjarskóla, telur þjónustustig í sínum skóla orðið of lágt.

„Ég reyni að jafna út þeim gæðum sem ég hef í starfinu til að láta hlutina bitna sem minnst á nemendum. En hópar nemenda í kennslu verða stærri og einstaklingsbundin þjónusta minni,“ segir Þorsteinn.

Skólastjórinn segir niðurskurðinn líka ná til sérkennslu. „Ég vil meina að sérkennsla í Reykjavík hafi á síðasta ári verið skorin beint niður um 20 prósent. Með boðun um yfirfærslu á halla og frekari niðurskurði spyr maður sig á hvaða leið við erum.“

Frá 2008 hefur ekki fengist fjárveiting til að endurnýja áhöld og tæki að því er Þorsteinn greinir frá.

Grunnskólar hafa almennt ekki fengið úthlutað fé til búnaðarkaupa í mörg ár, fyrir utan tölvukost.

„Þetta hefur auðvitað áhrif á aðstöðuna. Hún er víða töluvert bágborin,“ segir Guðlaug Erla Gunnarsdóttir skólastjóri Ingunnarskóla og formaður Félags skólastjórnenda í Reykjavík.

Guðlaug getur þess að margir skólar hafi ekki náð utan um reksturinn, eins og hún orðar það. „Þjónustan hefur kallað á meiri fjármuni en hefur verið úthlutað. Þetta er mikið áhyggjuefni. Við náum ekki utan um starfið eins og við viljum hafa það. Það er til dæmis minni sveigjanleiki til að hafa fámennari hópa í kennslu.“

Guðlaug segir unnið að nýju líkani sem úthluta á eftir. „Okkur finnst að það eigi að klára þá vinnu áður en við tökum á okkur halla á milli ára. Reksturinn er misþungur eftir skólagerðum.“