Meirihluti vill að Steinþór segi upp hjá Landsbankanum

Meirihluti þeirra sem tók afstöðu í könnun fréttastofu 365 finnst að bankastjóri Landsbankans eigi að segja upp störfum vegna Borgunarmálsins svokallaða. Meirihluti stuðningsmanna Sjálfstæðisflokksins telur hins vegar ekki að bankastjórinn þurfi að víkja.

Könnunin var gerð á þriðjudag og miðvikudag og spurt: Finnst þér að Steinþór Pálsson bankastjóri Landsbankans eigi að segja upp störfum vegna Borgunarmálsins? Hringt var í 1.158 manns og var svarhlutfall 69,2 prósent.

Þrjátíu og átta prósent svarenda sögðu já en tuttugu og tvö prósent nei. Allmargir voru óákveðnir eða 31% og 8% prósent neituðu að svara.

Karlar eru frekar á því að bankastjórinn eigi að segja upp starfi sínu en konur, eða 42 prósent karla á móti 34 prósentum kvenna.

Meirihluti er fyrir uppsögn bankastjórans hjá stuðningsmönnum allra flokka á Alþingi nema hjá stuðningsmönnum Sjálfstæðisflokksins. Fimmtíu og sex prósent þeirra telja að bankastjórinn þurfi ekki að segja upp störfum en 53 prósent stuðningsmanna hins stjórnarflokksins, eða Framsóknar, telja að bankastjórinn ætti að segja upp störfum.

Svör stuðningsmanna Bjartrar framtíðar eru varla marktæk vegna þess hversu fáir gefa sig upp á flokkinn (50% sögðu já), 62 prósent kjósenda Samfylkingarinnar, 67 prósent Vinstri grænna og 73 prósent stuðningsmanna Pírata finnst að Steinþór ætti að segja upp störfum.

Skoðanir fólks á málinu dreifast svipað eftir kjördæmum og er meirihluti fólks í þeim öllum á því að bankastjórinn ætti að taka pokann sinn. Meirihlutinn er þó minnstur í Reykjavík, eða 59 prósent en stærstur í Norðvesturkjördæmi þar sem 81 prósent íbúanna finnst að bankastjórinn ætti að segja upp störfum.

Þá er eldra fólk ákveðnara í afstöðu sinni en yngra fólkið, 34 prósent 18 til 49 ára finnst að bankastjórinn ætti að hætta en 43 prósent þeirra sem eru 50 ára og eldri finnst að Steinþór Pálsson ætti að segja upp störfum.