Gerum betur

Hrannar B. Arnarsson skrifaði grein í Fréttablaðið 6. júlí með yfirskriftinni „Af hverju alltaf bara strákar?“ og gagnrýnir RÚV og Stöð 2 fyrir að fjalla ekki jafnt um stráka- og stelpumót í fótbolta. Áður en lengra er haldið vil ég benda á eftirfarandi: RÚV hefur sýnt frá stelpu- og strákamótum til jafns í fréttum RÚV í sumar.

Í grein sinni fullyrðir Hrannar að ekki hafi verið fjallað um tiltekin íþróttamót stúlkna en þar hleypur hann á sig því ef hann hefði kynnt sér málið betur hefði hann séð að RÚV fjallaði svo sannarlega um þessi tilteknu mót í fréttum sínum. Leiðréttist það hér með.

Umræðan um kynjamisrétti í íþróttum er samt sem áður þörf og vert að staldra við. Það er skýr og yfirlýst stefna RÚV að gæta jafnræðis um íþróttir kvenna og karla, rétt eins og í allri annarri dagskrárgerð og umfjöllun. Við viljum fjalla um íslenskt afreksfólk á stórmótum hvort sem um ræðir konur eða karla, börn eða fullorðna. Í þessum skrifuðu orðum fer Evrópumótið í frjálsum íþróttum fram í Amsterdam. Þar eru fimm frábærir fulltrúar Íslands. Fjórar konur og einn karl. RÚV sýnir beint fá öllum keppnisdögunum og fylgist sérstaklega með íslensku keppendunum. Þá sýndi RÚV beint frá Evrópumótinu í sundi í maí s.l. þar sem Hrafnhildur Lúthersdóttir hlaut þrenn verðlaun og vann hug og hjörtu Íslendinga. RÚV var á staðnum og náði að fanga þetta ótrúlega afrek sundfólksins okkar.

Auðvitað er ekki hægt að sýna beint frá öllum íþróttaviðburðum sem tengjast íslensku íþróttafólki því við erum svo heppin að eiga margt framúrskarandi og glæsilegt íþróttafólk sem keppir úti um allan heim. Hér heima kappkostum við að sinna sem fjölbreyttastri íþróttaumfjöllun og þess gætt í hvívetna að fjallað sé jöfnum höndum um karla- og kvennaflokka. Hvort sem um er að ræða Íslandsmótið í golfi eða bikarúrslitin í körfubolta þá er ávallt stefna RÚV að sýna frá kvenna- jafnt sem karlamótum.

Hlutverk okkar er einnig að varðveita glæsilega íþróttasögu Íslendinga og á vormánuðum voru sýndir þættir um íþróttaafrek Íslendinga þar sem ógleymanleg afrek í íslenskri íþróttasögu voru rifjuð upp, bæði kvenna og karla. Framundan eru svo Ólympíuleikarnir og Ólympíumót fatlaðra í Ríó og þar mun RÚV halda sínu striki og halda á lofti jafnrétti kynjanna hvað þetta varðar. Ég leyfi mér að fullyrða að fáar sjónvarpsstöðvar í heiminum gæta orðið eins vel að þessu kynjajafnræði í beinum íþróttaútsendingum og almennri umfjöllun.

Þess má einnig geta að RÚV hefur að undanförnu stigið mörg stór framfaraskref í jafnréttismálum og sjást þess merki í allri starfseminni, þar á meðal í dagskrá. En það má alltaf gera betur, um það erum við fullkomlega meðvituð og höfum að leiðarljósi í okkar starfi. Það þarf t.a.m. nauðsynlega að fjölga konum í röðum íþróttafréttamanna og þar hefur RÚV nú þegar lagt sitt lóð á vogaskálar með því að standa fyrir árangursríku námskeiði fyrir konur sem áhuga hafa á starfinu. Við fögnum öllum ábendingum sem geta leitt til bættrar þjónustu við landsmenn. Jafnrétti skiptir okkur miklu máli og við viljum breyta, – það er okkar stefna og við ætlum að fylgja henni eftir.

Þessi grein birtist fyrst í Fréttablaðinu.