Duterte gæti verið ákærður vegna morðjátningar sinnar

Rodrigo Duterte, hinn umdeildi forseti Filippseyja, gæti átt ákæru yfir höfði sér. Hann sagði á dögunum opinberlega að hann hefði myrt tvo grunaða glæpamenn þegar hann gegndi embætti borgarstjóra í Davao. Tilgangurinn var að sýna lögreglumönnum fordæmi.

Öldungaþingmaður í Filippseyjum segir að um brot á trausti almennings sé að ræða og einnig séu um alvarlegan glæp að ræða. Það gæti verið tilefni til að kæra Duterte fyrir embættisbrot og reka hann frá völdum.

Sjá einnig: Duterte segist sjálfur hafa drepið fólk.

Samkvæmt Reuters fréttaveitunni hefur lögreglan skotið rúmlega tvö þúsund manns til bana í aðgerðum sem tengjast stríðinu svokallaða gegn fíkniefnum. Lang flestir þeirra eru sagðir hafa veitt mótspyrnu við handtöku.

Þar að auki eru þrjú þúsund morð til rannsóknar þar sem grunur leikur á að sjálfskipaðar löggæslusveitir hafi myrt meinta fíkniefnasala og neytendur.

Formaður dómsmálanefndar þingsins í Filippseyjum segir Duterte hafa gefið færi á sér til ákæru með játningu sinni.

Bandamenn Duterte í þinginu hafa þó skorað á þingmenn stjórnarandstöðunnar til að kæra forsetann fyrir embættisbrot. Þingmenn andstöðunnar eru færri en 50 af 239 manna þingi og tvo þriðju atkvæða til að staðfesta slíka kæru.