Duterte vill taka „fimm eða sex“ manns af lífi á dag

Rodrigo Duterte, hinn umdeildi forseti Filippseyja, segist vilja taka upp dauðarefsingar í landinu að nýju og taka „fimm eða sex“ glæpamenn af lífi á hverjum degi.

„Við vorum með dauðarefsingar hér áður fyrr, en ekkert gerðist. Gefið mér þær aftur og ég myndi beita þeim á hverjum degi: fimm eða sex á dag. Ég er ekki að grínast,“ segir Duterte.

Í frétt SVT kemur fram að trúarleiðtogar og talsmenn mannréttindasamtaka hafi fordæmt orð forsetans. „Fólk mun álíta Filippseyjar mjög villimannslegar,“ segir Jerome Secillano, forsvarsmaður áhrifamikillar kaþólskrar stofnunar í landinu.

Duterte er mjög umdeildur maður og tók við forsetaembættinu í sumar. Reuters greinir frá því að lögreglan á Filippseyjum hafi skotið rúmlega tvö þúsund manns til bana í aðgerðum sem tengjast stríðinu svokallaða gegn fíkniefnum. Flestir þeirra eru sagðir hafa veitt mótspyrnu við handtöku.

Þar að auki eru þrjú þúsund morð til rannsóknar þar sem grunur leikur á að sjálfskipaðar löggæslusveitir hafi myrt meinta fíkniefnasala og neytendur.

Dauðarefsingar voru afnumdar á Filippseyjum árið 2006.