Markakeppni hjá landsliðskonunum á Selfossi

Landsliðskonurnar Hrafnhildur Hanna Þrastardóttir og Lovísa Thompson fóru báðar á kostum á Selfossi í kvöld í lokaleik níundu umferð Olís-deildar kvenna.

Hrafnhildur Hanna Þrastardóttir skoraði tólf mörk og vann markakeppnina en tíu mörk Lovísu Thompson hjálpuðu Gróttuliðinu að vinna fimm marka sigur, 30-25.

Grótta er áfram bara í sjötta sæti deildarinnar þrátt fyrir sigurinn en nú tveimur stigum á undan Selfossliðinu.

Það var allt jafnt í hálfleik, 14-14, en Íslandsmeistarar Gróttu sýndu styrk sinn í seinni hálfleiknum.

Gróttuliðið er að rétta úr kútnum en þetta var annar sigur liðsins í röð eftir að hafa tapað sex af fyrstu sjö leikjum sínum í deildinni.

Innkoma Önnu Úrsúlu Guðmundsdóttur hefur þar mikil áhrif en hún var með sex mörk í leiknum í dag.



Selfoss- Grótta 25-30 (14-14)

Mörk Selfoss: Hrafnhildur Hanna Þrastardóttir 12, Perla Ruth Albertsdóttir 3, Dijana Radojevic 3, Adina Maria Ghidoarca 3, Carmen Palamariu 3, Kristrún Steinþórsdóttir 1.

Mörk Gróttu: Lovísa Thompson 10, Anna Úrsúla Guðmundsdóttir 6, Sunna María Einarsdóttir 5,  Anna Katrín Stefánsdóttir 3, Laufey Ásta Guðmundsdóttir 2, Þórey Anna Ásgeirsdóttir 2, Guðný Hjaltadóttir 1, Emma Havin Sardarsdóttir 1.