Hagnaður Arion banka minnkar

Hagnaður Arionbanka nam sex milljörðum króna á þriðja ársfjórðungi og lækkaði um 1,5 milljarða miðað við sama ársfjórðung í fyrra.

Vaxtamunur bankans sem er sú álagning sem er mismunur á lánum og innistæðum var 3,1% og var sá sami og fyrir sama fjórðung í fyrra.

Hagnaður bankans það sem af er ári nam ríflega 17 milljörðum króna samanborið við ríflega 25 milljarða hagnað fyrstu níu mánuði ársins í fyrra.

Arðsemi eiginfjár á þriðja fjórðungi var 14,2% sem er litlu lægra en á sama fjórðungi í fyrra.

Höskuldur Ólafsson, bankastjóri segir í tilkynningu að afkoma fyrstu níu mánuði ársins sé viðundandi en grunnrekstur bankans heldur undir væntingum. Grunnrekstur bankans var engu að síður traustur. Tier 1 eiginfjárhlutfall bankans er 22,2 prósent.

Eiginfjárhlutföll íslensku bankanna eru há í alþjóðlegum samanburði og breyting á kröfum um hlutfall myndi að óbreyttu losa um talsvert laust fé.