Gunnar Örlygsson: Rekið mig frekar en þjálfarann

Gunnar Örlygsson, formaður Körfuknattleiksdeildar Njarðvíkur, tjáði sig um þjálfaramál karlaliðs félagsins á fésbókinni í kvöld eftir að Njarðvíkurliðið datt út úr Maltbikarnum á móti nágrönnum sínum í Keflavík.

Njarðvíkurliðið var þrettán stigum yfir í hálfleik en leikur liðsins hrundi í þriðja leikhlutanum og Keflvíkingar gengu á lagið. Keflavík vann leikinn á endanum með sex stigum og Njarðvíkingar geta því farið að einbeita sér að deildinni.  

Gunnar réði hinn unga Daníel Guðna Guðmundsson sem þjálfara Njarðvíkurliðsins en Daníel er fimm árum yngri en fyrirliði liðsins Logi Gunnarsson.

Gunnar segir vera farinn að heyra af óánægju með þjálfara liðsins og taldi þörf til að koma skilboðum til stuðningsfólks Njarðvíkur í kvöld.

„Ég styð mitt lið og minn þjálfara 100%. Nú eru neikvæðar raddir byrjaðar að heyrast um gengi liðsins okkar - Njarðvík. Ég skil þessa óþolinmæði,“ skrifaði Gunnar en bætti við:

„Ef eh á að reka - þá skal reka mig fyrir að hafa ekki staðið mig í stykkinu með stóra leikmenn i liðið. Þarna féll ég á prófinu sem formaður KKD Njarðvíkur. En það er ekki öll nótt úti enn,“ skrifaði Gunnar.

Njarðvík er í áttunda sætinu eftir fimm umferðir í Domino´s deildinni með tvo sigra í fimm leikjum. Sigrar liðsins komu þó á móti tveimur neðstu liðunum sem eru Skallagrímur og Snæfell.