Saga á bak við hvern bita

Hótel Saga býður nú upp á að geta sagt viðskiptavinum sínum hvaðan lambakjötið sem er á boðstólum þeirra kemur. Gildir það fyrir alla veitingastaði innan hótelsins, Grillið, Skrúð og Súlnasal.

Alls kaupir hótelið 80 lömb á viku eða um 10 tonn það sem eftir er árs. Kjötið kemur frá Vopnafirði en kjöt þaðan hefur verið að skora hátt í stöðlum sauðfjárbænda undanfarin ár.

„Við erum með fyrstu veitingastöðunum á Íslandi sem getur sagt viðskiptavinunum frá hvaða bæ kjötið er. Það sem er slátrað fer bara í bland í poka í stóran frystigám og enginn veit upprunann,“ segir Ólafur Helgi Kristjánsson, yfirkokkur á Hótel Sögu.

„Við vorum að fá kjöt frá bænum Bustarfelli sem hefur hangið lengur en venjan er og við látum það hanga enn lengur. Þannig erum við að auka gæðin og fáum betra kjöt,“ segir Ólafur en viðtökurnar hafa verið góðar meðal viðskiptavina, hvort sem þeir eru erlendir eða íslenskir. Með þessu er markmiðið að koma Hótel Sögu nær eigendum sínum sem eru bændur landsins.

„Þetta er stórt skref en vonandi bara það fyrsta. Kjarnafæði og sláturhúsið á Vopnafirði hefur verið okkur innan handar og án þeirra væri þetta ómöguleg,“ segir Ólafur. Viðtökurnar hafi verið góðar.

„Það hefur verið lenska að frysta kjötið of snemma eftir slátrun á Íslandi en með góðu samstarfi er hægt að fá meira og betra bragð,“ segir Ólafur Helgi.

Fréttin birtist fyrst í Fréttablaðinu.