Umfjöllun og viðtöl: Grindavík - Þór Þorl. 73-71 | Lewis með sigurkörfuna í blálokin

Grindvíkingar unnu tveggja stiga sigur á Þorlákshafnar Þórsurum, 73-71, í fyrstu umferð Domino´s deildar karla í körfubolta eftir æsispennandi viðureign í Röstinni í Grindavík í kvöld.

Bandaríkjamaðurinn Earnest Lewis Clinch Jr. kórónaði frábæran leik sinn með því að skora sigurkörfuna í lokin.

Leikur Þórsliðsins hrundi algjörlega í lokin en Grindvíkingar skoruðu fimmtán síðustu stig leiksins og nýttu sér það að Þórsarar skoruðu ekki síðustu sex mínúturnar í leiknum.

Earnest Lewis Clinch Jr. skoraði alls 37 stig í leiknum og var langstigahæstur Grindvíkinga í leiknum. Ólafur Ólafsson kom næstur með 15 stig. Tobin Carberry skoraði 23 stig fyrir Þórsliðið og Maciej Baginski var með 14 stig.

Þórsarar urðu meistarar meistaranna á dögunum en þrátt fyrir hrakspár þá sýndu Grindvíkingar styrk sinn í kvöld. Það var ekki heldur slæmt að endurheimta Lewis Clinch í toppformi.

Grindvíkingar byrjuðu betur og voru sex stigum yfir eftir fyrstu leikhlutann, 26-20 en góður annar leikhluti Þórsara færði þeim þriggja stiga forystu í hálfleik, 40-37.

Það leit út fyrir að Þórsarar væru með góð tök á leiknum fyrir lokaleikhlutann enda komnir þá níu stigum yfir, 62-53.

Heimamenn í Grindavík gáfust ekki upp, unnu sig inn í leikinn og það var svo Earnest Lewis Clinch Jr. sem tryggði sínum mönnum sigur í endurkomuleik sínum í Grindavíkurliðið.  Þórsarar voru 71-56 yfir þegar rúmar sex mínútur voru eftir en þeir skoruðu ekki fleiri stig og misstu á endanum frá sér sigurinn.

Kristinn Geir Friðriksson, sérfræðingur í Dominos-Körfuboltakvöldi á Stöð 2 Sport, var okkar maður á vellinum. Hann mun skila sinni skýrslu á Vísi síðar í kvöld.

Grindavík-Þór Þ. 73-71 (26-20, 11-20, 16-22, 20-9)

Grindavík: Earnest Lewis Clinch Jr. 37, Ólafur Ólafsson 15/6 fráköst/6 stolnir, Þorsteinn Finnbogason 9/9 fráköst, Ómar Örn Sævarsson 5/5 fráköst, Nökkvi Már Nökkvason 3, Hamid Dicko 2, Jens Valgeir Óskarsson 2, Þorleifur Ólafsson 0/7 fráköst.

Þór Þ.: Tobin Carberry 23/7 fráköst, Maciej Stanislav Baginski 14/6 fráköst, Ragnar Örn Bragason 13, Emil Karel Einarsson 8, Ólafur Helgi Jónsson 5, Halldór Garðar Hermannsson 4, Davíð Arnar Ágústsson 2/4 fráköst, Magnús Breki Þórðason 2.



Textaýsing frá leik Grindavíkur og Þór Þ.:

Jóhann: Mikill karakter í liðinu

„Það var mikill karakter í liðinu á síðustu metrunum og ég er ánægður með hafa klárað þetta. Það var ákveðin heppni í þessu þar sem Magic klikkaði í sniðskoti á ögurstundu. Okkur er alveg sama, þetta voru tvö stig fyrir okkur“ sagði Jóhann Ólafsson, þjálfari Grindavíkur.

Hann má vera sáttur því þegar um fimm mínútur lifðu leiks var staðan 58-71 og allt útlit fyrir sigur gestanna.

„Það er er mjög mikilvægt fyrir okkur að vinna fyrsta leik. Þessi sigur gefur liðinu mikið því við erum að sanna eitt og annað fyrir okkur sjálfum eftir hrakspár spekinganna“ sagði Jóhann en liðinu hefur verið spáð dræmu gengi í vetur þar sem Grindvíkingar urðu fyrir blóðtöku milli tímabila og ekki náð að bæta miklu við sig.

Aðspurður um mikilvægi þess að hafa fengið Lewis Clinch til liðsins sagði Jóhann: „Þegar hann [Clinch] hafði samband og vildi koma var það umhugsunarlaus ákvörðun þó svo að einhverjir hafi haft efasemdir um að hann hafi ekki spilað körfubolta síðustu tvö ár. Hann er hörkuleikmaður og sá maður sem við þurfum og sýndi það þegar hann kláraði þetta hérna í kvöld fyrir okkur.“

Einar Árni: Hrundum eins og spilaborg

„Ég hlakka ekkert sérstaklega til að horfa á þetta aftur en það er vissulega nauðsynlegt því við hrundum eins og spilaborg síðustu fimm mínútur leiksins og gátum ekki keypt körfu. Þeir gengu á lagið og stemningin varð öll þeirra og við köstuðum þessu í raun frá okkur,“ sagði Einar Árni Jóhannson, þjálfari Þórs.

Liðið hans leiddi með 13 stigum þegar fimm mínútur voru eftir og lenti þá á vegg sem þeim tókst ekki að klífa, þrátt fyrir að hafa sýnt nokkra yfirburði á löngum köflum í leiknum.

„Við vorum komnir í 15 stiga forystu á erfiðum útivelli en ef við tölum í hreinskilni þá er þeirra lið töluvert styttra á veg komið i undirbúningi. Clinch kom t.d. til landsins á sunnudaginn en það vorum við sem spiluðum eins og lið sem er nýkomið saman. Við köstuðum  boltanum frá okkur trekk í trekk og sjaldnast útaf frábærri vörn andstæðinganna. Við koðnuðum í lokin. Það sem ég tek úr þessum leik er að við snertum botn og þurfum að stilla okkur af“ sagði Einar, svekktur með liðið sitt sem náði ekki að sýna styrk sinn gegn fyrirfram veikburða liði Grindavíkur.

„Það væri kjánalegt að hópur af ungum mönnum í Þorlákshöfn héldi það að hann gæti komið til Grindavíkur og labbað yfir þá. Okkur er spáð fjórða sæti án þess þó að sé verið að gera of mikið úr okkar liði en deildin er jöfn og við þurfum að spila vel til að vinna, sérstaklega á útivelli. Í kvöld spiluðum við tvo góða kafla; annar leikhluti var fínn og svo voru augnablik frá seinni hluta þriðja og vel inní fjórða hluta þar sem lykilmenn hvíldu,“ sagði Einar.

„Ég verð að taka það á mig því í þetta skipti ætlaði ég að treysta þeim sem eiga að heita lykilmenn en þeir náðu því miður ekki að bæta í það sem á undan gekk og klára leikinn. Það voru sex mínútur eftir þegar Grindavík hóf áhlaupið sitt og við náðum ekki að svara því. Bara döpur frammistaða hjá okkur, því miður,“ sagði Einar að lokum og mátti vera hundfúll með sína menn.

Tweets by @Visirkarfa1