Gleraugnasali líkir ástandinu á Hverfisgötu við góða grínmynd

„Við erum ekkert að tala um að breyta allri götunni heldur bara að komið verði til móts við fólkið þannig að allir verði velkomnir hingað,“ segir Anna Þóra Björnsdóttir, eigandi gleraugnaverslunarinnar Sjáðu á Hverfisgötu.

Anna hefur ásamt eiginmanni sínum rekið verslunina á Hverfisgötu í fjögur ár. Allan þann tíma segir Anna að staðið hafi yfir breytingar á götunni.

„Við erum alls ekki óánægð með að það hafi verið farið í framkvæmdir á götunni. En það er búið að vera rosalega slæmt aðgengi að versluninni í fjögur ár,“ segir Anna sem kveður ekki bæta úr skák að upplýsingar um þau verkefni sem ráðist er í séu aldrei veittar fyrirfram og götulokanir séu tíðar.

„Maður heyrir bara hingað og þangað hvernig þetta á að vera. Svo benda allir hver á annan,“ segir Anna. Stór hópur af viðskiptavinum hennar sé eldri Reykvíkingar sem vilji versla í miðbænum en komist ekki. Strætó stansi ekki nema á Hlemmi, Lækjartorgi og við Hörpu og við breytinguna hafi bílastæðum við götuna fækkað um meira en fimmtíu.

„Þeir sem koma á bílum eiga að leggja í bílastæðahúsunum en það var allt sundurgrafið við bílastæðahúsið gegnt Þjóðleikhúsinu þannig að gamalt fólk með göngugrindur eða fólk með mæður sínar í hjólastól gat ekki farið þaðan,“ segir Anna. Enginn treysti sér heldur til að leggja í bílastæðahúsinu á Vitatorgi.

„Allir útigangsmennirnir eru þar og þar er búið að pissa og kúka allt út. Þegar ég segi áttatíu ára gömlum, sætum konum að leggja þar koma þær í áfalli til mín. Það vill enginn fá einhvern blindfullan Rússa öskrandi á sig,“ segir gleraugnasalinn.

Þá nefnir Anna mikil vandkvæði við vörumóttöku því hvergi sé hægt að stoppa. Hún bendir á að við hlið hennar verslunar hafi verið og sé vinsæll indverskur veitingastaður til 23 ára. Þar sé mikið selt út af veislumat.

„Starfsfólkið er að hlaupa hér um í hálku niður á Skúlagötu með hrísgrjón í pottum til að koma í bíl. Svo þegar það er komið hótel í hvert einasta hús og fimmtíu kínverskar fjölskyldur á bílaleigubílum eru líka í þessu stappi þá er þetta auðvitað eins og mjög góð grínmynd,“ segir Anna sem kveðst litlar undirtektir hafa fengið hjá borginni.

„Ég er búin að tala við alla og manni er bara ekki svarað. Við fengum þó leiðindabréf þar sem sagt er að búið sé að gera þessa götu fyrir milljarð og að við séum að fara fram á að hún verði endurhönnuð. Það er ekki rétt. Ef maður er að byggja sér einbýlishús og raðar inn í það og finnur svo að það er ekki alveg að ganga þá bara breytir maður,“ segir Anna.

Svigrúm til breytinga sér Anna í að gangstétt er báðum megin við hjólastíg við götuna. „Það er aldrei neinn sem labbar á gangstéttinni sem er nær götunni. Það má alveg setja stæði þar sem er merkt fyrir hjólastóla og vöruafgreiðslu. Ég er með fólk sem kemur með Ferðaþjónustu fatlaðra og hvar á það að stoppa? Þetta er vandamál sem þarf að leysa án þess að vera alltaf með einhvern skæting.“ 

Fréttin birtist upphaflega í Fréttablaðinu.