Óska eftir vitnum að árekstri á Akureyri í morgun

Lögreglan á Norðurlandi eystra óskar eftir vitnum að árekstri sem varð á gatnamótum Þingvallastrætis og Dalsbrautar klukkan átta í morgun.

Lögregla segir á Facebook-síðu sinni að ökumaður og farþegar í annarri bifreiðinni hafi leitað á slysadeild eftir áreksturinn með minniháttar meiðsl.

„Nokkuð mikil umferð var á þessum tíma á og við gatnamótin. Við óskum eftir því að ná tali af mögulegum vitnum af árekstrinum. Ef þið hafið einhverjar upplýsingar sem geta nýst okkur við skoðun málsins, þá endilega hafið samband við okkur í einkaskilaboðum hér á facebook eða á lögreglustöðina á Akureyri sími 4442800,“ segir í færslunni.