Hvar eru þingmenn Reykvíkinga?

Fólkið á landsbyggðinni þekkir sína kjörnu fullrúa, ekki er hægt að segja það sama um Reykvíkinga. Það er eins og það sé enginn talsmaður Reykvíkinga á Alþingi. Nú er svo komið að vinstri meirihlutinn í borginni er í óða önn að grafa undan góðum samskiptum landsbyggðarinnar og höfuðborgarinnar með flugvallarmálinu og það verður að stöðva. Það er tímaskekkja að loka Reykjavíkurflugvelli, sérstaklega í ljósi aukins ferðamannastraums. Það er mikill lúxus og forréttindi að hafa flugvöll inni í borginni og ef eitthvað er verðum við að bæta þjónustuna á Reykjavíkurflugvelli og opna öryggisbrautina aftur.

Sprungið vegakerfi

Það er Alþingi sem setur sveitarstjórnum lög og er það skylda Alþingis að passa upp á að sveitastjórnarlögum sé fylgt eftir. Af hverju láta þingmenn Reykjavíkur, meirihluta borgarstjórnar bjóða sér og íbúum borgarinnar upp á ónýtt og löngu sprungið vegakerfi þar sem fólk er fast í bílum sínum svo klukkutímum skiptir í viku hverri, fáránlega lélegan aðbúnað fyrir eldri borgara, mengun og óþrifnað, gras ekki slegið né snjór mokaður fyrr en allt er orðið vitlaust, lóðaskort, gjaldþrota leikskólastefnu og aðrar vonlausar hugmyndir. Endalaust er gengið yfir íbúa Reykjavíkur, hvergi annars staðar á landinu kæmust menn upp með svona vinnubrögð og það í sjálfri höfuðborginni.

Lagning Sundabrautar

Það nýjasta er skipulag 16.000 manna byggðar á Hlíðarenda við hlið Reykjavíkurflugvallar. Þarna á að setja niður sama mannfjölda og býr á Akureyri, á sama stað og þessi nýi spítali á að rísa. Nóg hefur nú verið talað um umferðarteppuna sem nú þegar er vandamál og margfaldast við byggingu nýja spítalans, en nei nei, þeir bættu við einu stykki Akureyri í mixið! Hvar eru þingmenn Reykjavíkur? Af hverju er ekki svona endaleysa stoppuð? Við verðum að lagfæra og bæta allar stofnæðar strax inn og út úr borginni. Við verðum að fara í byggingu Sundabrautar.

Stöðugleiki

Í dag búum við Íslendingar við fínan stöðugleika og við erum að lifa einhverja mestu uppgangstíma hagsögunnar og er það ekki síst hinum aukna straum ferðamanna til landsins að þakka. Auknar gjaldeyristekjur, næg atvinna, lækkandi vextir og lítil sem engin verðbólga eru staðreyndir. En betur má ef duga skal, og við verðum að afnema greiðsluþátttöku sjúklinga og tekjutengingu launa eldri borgara og öryrkja. Við verðum að einfalda og lækka tekjuskatt á almenning, hækka skattleysismörkin a.m.k. í 250.000 kr.

Lækka verður strax tryggingargjaldið en flest fyrirtæki á landinu eru í Reykjavík og það er til skammar hvernig Reykjavíkurborg kemur fram við atvinnulífið og úr því þarf að bæta. Ef mér verður veitt brautargengi í prófkjöri Sjálfstæðisflokksins í Reykjavík nk. laugardag þá lofa ég því að ég skal berjast með kjafti og klóm fyrir Reykvíkinga. Það er kominn tími til að einhver tali máli Reykvíkinga á Alþingi Íslendinga og ég vil taka þá vinnu að mér kjósandi góður.

Þessi grein birtist upphaflega í Fréttablaðinu.