Airbnb fyrir glósur

Startup Reykjavik fer fram í fimmta sinn um þessar mundir. Tíu fyrirtæki hafa tekið þátt ár hvert. Fréttablaðið kynnti sér starfsemi þeirra fyrirtækja sem kynntu sig á PopUp & Pitch-kvöldinu á fimmtudaginn.

Í hverjum einasta bekk er einhver snillingur sem býr til æðislegar glósur og markmiðið er að einhverju leyti að gera þessa manneskju að rokkstjörnu.“ Þetta segir Helgi Þorsteinsson, en hann ásamt Snæbirni Hersi Snæbjarnarsyni og Erwin Szudrawski standa að baki fyrirtækinu Noted. Noted er vettvangur fyrir stúdenta til að deila glósum og námsefni sín á milli.

„Þetta byggir á því að það er rosa mikill vilji hjá nemum að fá glósur og þeir sem eru að glósa fá oftar en ekki ekkert fyrir það og ef það er gert þá er það voða óskipulagt. Við ætlum að búa til vettvang þar sem þeir sem eru góðir að glósa búa til prófíl um sig og hlaða inn glósunum sínum og fólk getur gerst áskrifandi á glósurnar þeirra og þeir fá greitt fyrir það. Þetta er eins konar Airbnb fyrir glósur,“ segir Helgi.

„Í mörgum tilfellum er þetta nemandi sem hefur mikið fram að færa og getur kennt samnemendum sínum mjög mikið þannig að það eru allir bættir á því að viðkomandi láti glósurnar sínar og fái eitthvað í staðinn,“ segir Helgi.  

„Markmiðið er að appið verði tilbúið í lok Startup Reykjavík. Í haust verði búið að prófa vöruna og að þetta verði orðin nokkuð góð vara. Við ætlum svo líka að vera búin að ráða fullt af góðum glósurum þá.“ Teymið mun svo vinna áfram hjá fyrirtækinu í haust.

Teymið hefur góða reynslu af vörunni. Þeir settu frumgerð í loftið fyrir síðustu jólapróf sem var svo vinsæl að síðan fór niður. Helgi vill hvetja alla sem eiga glósur að prófa að setja þær inn. „Aðrir gætu nýtt sér þær og þú gætir fengið einhverjar tekjur.“



Fréttin birtist fyrst í Fréttablaðinu þann 9. júlí