Yfir 1600 tilboð bárust í gjaldeyrisútboði Seðlabankans

Rúmlega 98 prósent af þeim tilboðum sem bárust Seðlabanka Íslands í aflandskrónuútboði  fram fór 16. júní síðastliðinn var tekið. Útboðið er liður í losun fjármagnshafta.

Í tilkynningu sem Seðlabankinn sendi frá sér nú undir kvöld segir að bankinn hafi ákveðið að taka öllum tilboðum sem bárust á genginu 190 krónur á hverja evru eða lægra. Með fyrirvara um endanlegt uppgjör bárust alls 1.646 tilboð og var 1.619 tilboðum tekið. Fjárhæð samþykktra tilboða nam rúmlega 72 milljörðum króna af tæplega 178 milljörðum króna sem boðnar voru í útboðinu. Gjaldeyrisforði Seðlabanka Íslands minnkar um rúmlega 47 milljarða í kjölfar útboðsins.

Seðlabanki Íslands hefur ákveðið í framhaldi af þessari niðurstöðu að bjóðast til að kaupa á útboðsgenginu 190 krónur á hverja evru aflandskrónaeignir sem ekki voru seldar í útboðinu. Bankinn fer fram á að óskir um viðskipti berist Seðlabanka Íslands í gegnum milligönguaðila fyrir klukkan 10 næsta mánudag.

Þá segir að endanlegar tölur um niðurstöðu gjaldeyrisútboðsins 16. júní síðastliðinn að teknu tilliti til viðskipta sem til kann að stofnast á grundvelli fyrrgreindrar ákvörðunar verða birtar að afloknu uppgjöri viðskipta 29. júní 2016. Uppgjör viðskipta á grundvelli tilboðs Seðlabanka Íslands sem getið er um hér að framan fer fram sama dag.

Útboðið 16. júní 2016 var hið síðasta í röð tuttugu og þriggja útboða þar sem eigendum aflandskróna var boðið að kaupa erlendan gjaldeyri áður en stjórnvöld hefja losun fjármagnshafta á innlenda aðila, þ.e. á lífeyrissjóði, aðra lögaðila og einstaklinga.