Guðrún Margrét kaus í FG: „Spennandi að sjá úrslitin“

Allir forsetaframbjóðendurnir níu hafa nú kosið í kosningum til forseta Íslands sem fram fara í dag. Guðrún Margrét Pálsdóttir var sú seinasta til að kjósa en hún kom á kjörstað ásamt eiginmanni sínum í Fjölbrautaskólanum í Garðabæ um fjögurleytið í dag.

Hún segir kjördag leggjast vel í sig.

„Þetta er bara skemmtilegur dagur og það verður spennandi að sjá úrslitin og svo erum við að undirbúa kosningavöku heima og það eru allir velkomnir.“

Guðrún segist vona að réttur forseti verði kjörinn og að hann standi sig vel.