Opnað fyrir álagningarseðla í dag

Búið er að opna fyrir álagningarseðla einstaklinga á vef Ríkisskattstjóra og þannig hægt að skoða hvort fólk fær endurgreiðslu frá skattinum eða skuldi enn einhver opinber gjöld.

Álagningarskráin verður lögð formlega fram á morgun, mánuði fyrr en undanfarin ár. Skúli Eggert Þórðarson ríkisskattstjóri segir reynt að gera þetta vegna þeirra tæknibreytinga sem hafa orðið á undanförnum árum.

„Framtöl mjög margra eru nánast fullbúin, eða fullbúin, þannig að vinnslan hefur verið miklu þægilegri og betri,“ segir Skúli Eggert. „Það eru færri leiðréttingar hjá bótaþegum Tryggingastofnunar ríkisins af því að það tókst að setja inn svokallaðar áritunarupplýsingar. Að öllu þessu samanlögðu, þá var unnt að birta álagninguna fyrr og um leið lengja kærufrest eftir álagninguna úr þrjátíu dögum í sextíu daga.“

Langflestir sem skilað hafa skattframtali hafa óskað eftir því að fá ekki útprentaðan álagningarseðil í pósti, að sögn Skúla Eggerts.

Á föstudaginn, 1. júlí, verða inneignir greiddar út til einstaklinga og þá er jafnframt fyrsti gjalddagi af sex fyrir þá sem skulda skattinum.

Þann dag kemur jafnframt út árlegt Tekjublað Frjálsrar verslunar, þar sem áætlað er hvaða Íslendingar fengu mestar tekjur á liðnu ári.

Að því er kemur fram í tilkynningu á vef fjármálaráðuneytisins fjölgar framteljendum nú um 2,1 prósent á milli ára og eru þeir 277.606 talsins. Almennur tekjuskattur nemur 134,3 milljörðum króna og var hann lagður á tæplega 182 þúsund framteljendur.

Framtaldar skuldir heimilanna námu um 1.719 milljörðum króna í árslok 2015 og drógust saman um 2,7 prósent milli ára. Rúmlega 26 þúsund af um 96 þúsund fjölskyldum sem eiga íbúðarhúsnæði telja ekki fram neinar skuldir vegna þess.