Landsbankinn hagnast um 3,3 milljarða

Afkoma Landsbankans var jákvæð um 3,3 milljarða króna eftir skatta fyrstu þrjá mánuði ársins 2016 en hagnaður á sama tímabili árið 2015 nam 6,4 milljörðum króna.

Rekstrartekjur á fyrsta ársfjórðungi námu 11,5 milljörðum króna samanborið við 14,7 milljarða króna á sama tímabili árið 2015. Launakostnaður hækkaði í takti við ákvæði nýrra kjarasamninga en á hinn bóginn lækkaði annar rekstrarkostnaður þannig að heildarrekstrarkostnaður bankans lækkaði um 0,5 prósent miðað við sama tímabil 2015, segir í tilkynningu.

Vaxtamunur eigna og skulda nam 1,9 prósent á fyrsta ársfjórðungi 2016 en var 2,0 prósent á sama tímabili árið áður. Útlán Landsbankans jukust miðað við sama tímabil í fyrra, þrátt fyrir mikla og vaxandi samkeppni á lánamarkaði. Einnig hækkuðu þjónustutekjur vegna vaxandi viðskipta.

Vanskilahlutfall heldur áfram að lækka og var 1,7 prósent á 1. ársfjórðungi, samanborið við 2,3 prósent á sama tímabili í fyrra.

Kostnaðarhlutfall hækkaði sem skýrist einkum af lægri tekjum af verðbréfum. Kostnaðarhlutfall fyrstu þrjá mánuði ársins er 55,8 prósent samanborið við 48 prósent á sama tímabili árið áður.

Eigið fé Landsbankans var 267,8 milljarðar króna 31. mars síðastliðinn og eiginfjárhlutfallið var 31,2 prósent. Landsbankinn greiðir á þessu ári 28,5 milljarða króna í arð í tveimur greiðslum, annars vegar 20. apríl og hins vegar 21. september og gætir áhrifa arðgreiðslunnar því ekki í þessu uppgjöri.