Hagnaður VÍS dregst saman

Vátryggingafélag Íslands, VÍS, hagnaðist um 145 milljónir króna á fyrsta ársfjórðungi 2016, samanborið við 733 milljónir króna á sama tímabili 2015.

Samsett hlutfall var 104,5 prósent en var 105,2 prósent á sama tíma í fyrra .Tekjur af fjárfestingastarfsemi námu 425 milljónum króna samanborið við 1.113 milljónir króna árið 2015.

„Afkoma félagsins á fyrsta ársfjórðungi var undir væntingum þrátt fyrir ágætan vöxt í innlendum iðgjöldum, en bókfærð iðgjöld innanlands hækkuðu  um 11% frá sama tímabili í fyrra. Afkoman litast af slakri afkomu af skaðatryggingastarfsemi en tap er af bæði frjálsum og lögboðnum ökutækjatryggingum á tímabilinu. Fjárfestingastarfsemin innanlands gekk vel og var ávöxtun þeirra eigna 2,2% á fjórðungnum. Nokkuð gengis- og gjaldmiðlatap varð hins vegar af erlendum eignum félagsins eða um 300 milljónir króna. Félagið hefur dregið úr erlendri stöðu sinni á fjórðunginum,“ segir Sigrún Ragna Ólafsdóttir, forstjóri í tilkynningu.

Á aðalfundi félagsins sem haldinn var þann 16. Mars síðastliðinn var samþyktt aðrgreiðslu að fjárhæð 2 milljörðum króna sem greidd var til hluthafa þann 15. Apríl síðastliðinn. Gjaldþolshlutfall í lok mars var 1,86.