Arion banki greiðir niður skuldabréf um 31 milljarð

Arion banki mun greiða niður skuldabréf um 252.697.000 Bandaríkjadali föstudaginn 6. maí, auk áfallinna vaxta, eða sem nemur um 31 milljarði íslenskra króna. Þetta kemur fram í fréttatilkynningu frá bankanum.

„Skuldabréfið nam 747.481.000 Bandaríkjadölum (97 milljarðar kr.) þegar það var gefið út í upphafi árs. Skuldabréfið er í eigu Kaupþings og var útgáfa þess liður í aðgerðum sem snéru að afnámi fjármagnshafta,“ segir í tilkynningunni.

„Greiðslan er í samræmi við ákvæði skuldabréfsins sem kveða á um að Arion banki skuli greiða inn á bréfið gefi bankinn út skuldabréf í erlendri mynt eins og gert var þann 26. apríl þegar Arion banki gaf út skuldabréf að upphæð 300 milljónir evra.“