Vill að Bjarni og Ólöf segi af sér vegna Panama-skjalanna

Ólína Þorvarðardóttir Kjerúlf, þingmaður Samfylkingarinnar, vill að Bjarni Benediktsson, fjármálaráðherra og formaður Sjálfstæðisflokksins, og Ólöf Nordal, innanríkisráðherra og varaformaður Sjálfstæðisflokksins, segi af sér vegna tengsla sinna við aflandsfélög. Nöfn beggja ráðherra voru í Panama-skjölunum og var fjallað um þau í sérstökum Kastljósþætti sem sýndur var í byrjun mánaðarins.

Þetta kom fram í útvarpsþættinum Bítið á Bylgjunni í morgun. Þar ræddu Ólína og Jón Gunnarsson, þingmaður Sjálfstæðisflokksins, um tengsl fjölda Íslendinga við aflandsfélög sem Panama-skjölin afhjúpa, og ekki hvað síst þá staðreynd að ýmsir þeirra tengjast stjórnmálastarfinu í landinu.

Jón sagði að menn yrðu að gera greinarmun á málum Bjarna og Ólafar og annarra. Ólöf hafi til að mynda aldrei á nein viðskipti í gegnum það félag sem hún og eiginmaður hennar voru skráð fyrir.

 

„Við vitum að Bjarni Benediktsson millifærði peninga í eðlilegum viðskiptum. Hann tók síðan þessa peninga heim árið 2009, án þess að fara í gegnum skattaleið Seðlabankans, hvað voru þetta 20 eða 30 milljónir. Ég er að tala um þessa stóru mynd,“ sagði Jón.

Ólína sagðist einnig vera að tala um stóru myndina. Hún sagði stjórnmálamenn gefa ákveðið fordæmi með því að taka þátt í viðskiptum í gegnum aflandsfélög.

„Þetta er bara trúnaðarbrestur. Síðan geta þau [innsk. blm. Bjarni og Ólöf] freistað þess að sækja sér nýtt umboð til kjósenda í kosningum og það eru auðvitað rökin fyrir því að það á bara að leysa upp ríkisstjórnina núna og þingið og kjósa strax,“ sagði Ólína en hlusta má á viðtalið við hana og Jón í spilaranum hér að ofan