Viðskipti innlent

27 sagt upp hjá Plain Vanilla

Birgir Olgeirsson skrifar
Þorsteinn Friðriksson, forstjóri Plain Vanilla.
Þorsteinn Friðriksson, forstjóri Plain Vanilla.

Tuttugu og sjö starfsmönnum hefur verið sagt upp hjá tölvuleikjaframleiðandanum Plain Vanilla. Þetta kemur fram í tilkynningu frá fyrirtækinu sem segist vera að endurskipuleggja starfsemi sína hér á landi. Aukin umsvif í Bandaríkjunum kalli á það og er nú sett krafa um að fyrirtækið skili hagnaði.

Í tilkynningunni segir að fyrirtækið hafi vaxið hratt undanfarin ár, síðasta sumar störfuðu 86 hjá Plain Vanilla, rúmlega tvöfalt fleiri en ári áður. Í janúar síðastliðnum var stöðugildum hjá fyrirtækinu fækkað um fjórtán. Því hefur starfsfólki hjá fyrirtækinu fækkað um 41 í ár samkvæmt tölum frá fyrirtækinu og því um 45 stöðugildi þar í dag. 

Er stefnt að sameiningu Plain Vanilla og Glu Mobile á næstu tólf mánuðum en Glu Mobile keypti stóran hlut í íslenskan leikjaframleiðandanum í byrjun árs.

Sjá tilkynningu vegna málsins í heild hér fyrir neðan:

Íslenska tölvuleikjafyrirtækið Plain Vanilla hyggst auka umsvif sín í Los Angeles í Bandaríkjunum á næstu mánuðum. Þar er nú verið að leggja lokahönd á spurningaþáttinn QuizUp í stúdíói sjónvarpsrisans NBC og fór prufukeyrsla á þættinum fram aðfaranótt fimmtudags að íslenskum tíma. Stefnt er að því að fyrsti þátturinn fari í loftið í september. Nú þegar starfa tíu manns á vegum Plain Vanilla við þróun þáttarins á vesturströndinni og hér heima og mun vinnan þar vestra aukast eftir því sem nær dregur frumsýningunni.

Samtímis verður starfsemi Plain Vanilla hér á landi endurskipulögð og stöðugildum fækkað um 27 en þau hafa verið um 70 síðan í janúar. Starfsemi Plain Vanilla hefur vaxið hratt á undanförnum árum og starfsmannafjöldinn margfaldast. Fyrirtækið byrjaði með fjóra starfsmenn árið 2012 og þegar QuizUp appinu var hleypt af stokkunum í nóvember 2013 voru starfsmennirnir ekki nema 16. Sumarið eftir voru þeir 40 og ári síðar, í júní 2015 þegar þróunarstarfið náði hámarki, urðu þeir 86 talsins. Plain Vanilla flutti í stærra húsnæði við Laugaveg 77 árið 2014 og starfsemin verður þar áfram til húsa, en  starfsmannafjöldinn verður nú aftur svipaður og þegar fyrirtækið flutti inn.

Stefnir á að skila hagnaði á árinu
Plain Vanilla stefnir að því að skila hagnaði á árinu, annars vegar með því að afla meiri tekna í samvinnu við tölvuleikjaframleiðandann Glu Mobile Inc og hins vegar með samrekstri á ákveðnum sviðum sem skila mun samlegðaráhrifum. Tekjur fyrirtækisins af QuizUp hafa aukist en draga þarf úr rekstrarkostnaði til að flýta því að fyrirtækið skili hagnaði.  Umhverfi tæknifyrirtækja hefur breyst mikið undanfarið og víðast hvar í heiminum er nú áhersla á að þau skili hagnaði, en megináherslan var áður á vöxt óháð tekjum.

Tilkynnt var um það í upphafi árs að Glu Mobile, sem sérhæfir sig í að framleiða leiki fyrir snjallsíma og spjaldtölvur, hefði fjárfest í Plain Vanilla fyrir 7,5 milljónir bandaríkjadala sem samsvarar tæpum einum milljarði króna. Jafnframt öðlaðist Glu Mobile kauprétt á öllu hlutafé Plain Vanilla á fyrirfram umsömdu verði og er stefnt að sameiningu fyrirtækjanna, að uppfylltum ákveðnum skilyrðum, á næstu tólf mánuðum.

Glu í viðskiptum með Kardashian og Spears
Glu Mobile er skráð á NASDAQ verðbréfamarkaðinn og þróaði m.a. appið Kim Kardashian: Hollywood sem hefur notið mikilla vinsælda. Eins hefur fyrirtækið gert samning við söngkonuna Britney Spears um að þróa tölvuleik sem byggir á lífi hennar. Stærstu hluthafar Glu eru ýmsir fjárfestingarsjóðir. Kínverska fyrirtækið Tencent, sem er stærsta netfyrirtæki Asíu og það fjórða stærsta í heimi, keypti 15% hlut í Glu fyrir um 15 milljarða króna í apríl í fyrra. 

Þorsteinn B. Friðriksson, forstjóri Plain Vanilla: „Það felast afar spennandi tækifæri í vaxandi umsvifum vestanhafs og bíðum við spennt eftir að fyrsti QuizUp þátturinn fari í loftið í haust. Samhliða áherslunni á að nýta tækifærin sem fylgja munu í kjölfarið þá þurfum við að endurskipuleggja fyrirtækið  og horfa á eftir duglegu og hæfileikaríku fólki sem hefur unnið hörðum höndum við að koma QuizUp á þann stað sem það er í dag. Ég verð þeim ævinlega þakklátur fyrir eljuna og metnaðinn en veit jafnframt að þau munu ekki sitja lengi auðum höndum þar sem mikil eftirspurn er hjá íslenskum og erlendum fyrirtækjum eftir hæfileikaríku starfsfólki um þessar mundir.“


Tengdar fréttir

Fimm milljarðar króna í Plain Vanilla frá 2011

Gríðarleg gróska ríkir hjá leikjaframleiðendum á Íslandi. Forstjóri Plain Vanilla segir tíðarandabreytingu í fjárfestingaumhverfinu í Kísildal; meiri áhersla sé nú lögð á tekjur og hagnað.

Íslensku starfsmennirnir komnir heim

Skrifstofa QuizUp í New York mun koma til með að verða lokað í kjölfar fjárfestingar bandaríska tölvuleikjaframleiðandans Glu Mobile í Plain Vanilla.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
REGINN
1,95
13
154.180
KVIKA
0,79
3
26.427
SIMINN
0,56
3
33.788
MAREL
0,54
25
675.501
SKEL
0,25
3
5.182

Mesta lækkun dagsins


Félag
Br.%
Fjöldi
Velta*
EIK
-2,88
17
153.220
SJOVA
-2,54
8
107.416
TM
-2,48
6
95.263
VIS
-2,35
1
12.050
ICEAIR
-1,32
38
108.834
Velkomin á Vísi. Þessi vefur notar vafrakökur. Sjá nánar.