Alvogen kaupir lyfjafyrirtæki á 38,7 milljarða

Alvogen hefur tilkynnt um fyrirhuguð kaup á bandaríska lyfjafyrirtækinu County Line. Samkeppnisyfirvöld í Bandaríkjunum eiga þó eftir að samþykkja kaupin. Kaupverðið er talið vera um 38,7 milljarðar króna.

Samkvæmt tilkynningu frá Alvogen er fyrirtækið að styrkja markaðsstöðu sína í Bandaríkjunum og munu kaupin auka vöruframboð fyrirtækisins.

„Kaupin á County Line skapa góð tækifæri til áframhaldandi vaxtar Alvogen í Bandaríkjunum sem er stærsti einstaki markaður fyrirtækisins. Árlegar tekjur County Line eru yfir 13 milljarðar króna um hundrað milljónir dala,“ segir í tilkynningunni.

County Line sérhæfir sig í sölu lyfja sem eru flókin í þróun og er í dag með tólf lyf á markaði í Bandaríkjunum og níu væntanleg á markað. Reuters fréttaveitan hefur það eftir heimildum að kaupverðið sé um 300 milljónir dala, sem samsvarar um 38,7 milljörðum króna.

Þá segir einnig í frétt Reuters að eftir kaupin verði heildartekjur Alvogen um einn milljarður dala, eða um 130 milljarðar króna. Um 2.300 manns vinna hjá fyrirtækinu sem er með starfsemi í 35 löndum.

„Alvogen hefur verið í miklum vexti undanfarin ár og staða okkar á stærsta lyfjamarkaði heims hefur nú styrkst enn frekar. Sérhæfing okkar í Bandaríkjunum liggur í því að þróa og markaðssetja lyf sem eru flókin í þróun en þau lyf hafa oft á tíðum minni samkeppni,“segir Róbert Wessman, forstjóri Alvogen.

„Á undanförnum árum höfum við byggt upp sterkt orðspor fyrir áreiðanleika og góða þjónustu á mörkuðum okkar og munum halda því áfram. County Line er framsækið fyrirtæki og lyfjasafn þeirra er góð viðbót við vöruframboð okkar sem mun styðja við frekari vöxt Alvogen á komandi árum.“